काठमाडौं । प्रभु महालक्ष्मी लाइफ इन्स्योरेन्स लिमिटेडले चालु आर्थिक वर्षको प्रथम त्रैमासिक वित्तीय विवरण सार्वजनिक गरेको छ।
.gif)
उक्त विवरण अनुसार अवधिमा १२ करोड ६२ लाख रुपैयाँ नाफा आर्जन गरेको छ । यो अघिल्लो वर्षको सोही अवधिको तुलनामा २५.७४ प्रतिशतको वृद्धि हो । अघिल्लो वर्षको नाफा १० करोड ३ लाख रुपैयाँ थियो।
कम्पनीको महाविपत्ति कोषमा ९ करोड ६९ लाख रुपैयाँ र रिटेन्ड अर्निङमा ६२ करोड २५ लाख रुपैयाँ रहेको छ। अघिल्लो वर्षको असार महिनासम्मको तुलनामा महाविपत्ति कोषमा ६.९६ प्रतिशतको वृद्धि भएको छ भने रिटेन्ड अर्निङ ३४.८९ प्रतिशत घटेको छ। कम्पनीको जीवन बीमा कोषमा १० अर्ब ९९ करोड ७२ लाख रुपैयाँ रहेको छ । जुन अघिल्लो वर्षको तुलनामा ४५.७७ प्रतिशतको वृद्धि हो।
साथै, कम्पनीले १ अर्ब २० करोड ७१ लाख रुपैयाँ कुल बीमाशुल्क आर्जन गरेको छ । जुन अघिल्लो वर्षको १ अर्ब १५ करोड १५ लाख रुपैयाँको तुलनामा ४.८३ प्रतिशतको वृद्धि हो।खुद बीमाशुल्क आर्जन १ अर्ब १७ करोड २९ लाख रुपैयाँ पुगेको छ, जसमा ४.१८ प्रतिशतको वृद्धि भएको छ। कम्पनीको सेयरपुँजी ४ अर्ब ७२ करोड ५६ लाख रुपैयाँ रहेको छ।
यस वित्तीय प्रगतिको परिणाम स्वरूप, कम्पनीको वार्षिकीकृत प्रतिशेयर आम्दानी १०.६९ रुपैयाँ पुगेको छ, जुन अघिल्लो वर्षको ९.३५ रुपैयाँको तुलनामा वृद्धि भएको हो।
