काठमाडौ । नेपाल इन्भेष्टमेण्ट मेगा बैंकको नाफामा उच्च गिरावट देखिएको छ । बैंकले सार्वजनिक गरेको गत आर्थिक वर्षको अपरिष्कृत वित्तीय विवरण अनुसार अघिल्लो आवको भन्दा नाफामा उच्च गिरावट देखिएको हो । गत आवमा बैंकले २ अर्ब ७४ करोड ७२ लाख रुपैयाँ खुद नाफा आर्जन गरेका छ । जुन अघिल्लो आर्थिक वर्षको तुलनामा ३६.५९ प्रतिशतले कम हो । बैंकले अघिल्लो आवमा ४ अर्ब ३३ करोड २२ लाख रुपैयाँ नाफा कमाएको थियो । कर्जा नोक्सानी व्यवस्था (इम्पेयरिमेन्ट चार्ज) मा भएको उल्लेख्य बढोत्तरीका कारण बैंकको नाफा घटेको हो । राष्ट्र बैंकले गरेको व्यवस्था अनुसार निष्क्रिय कर्जाको जोखिम न्यूनीकरण वापत बैंकले यस्तो रकम छुट्याउनु पर्छ । गत आवमा बैंकको कर्जा लगानी पनि घटेको छ । गत आवमा बैंकले ६ अर्ब १९ करोड ३१ लाख रुपैयाँ प्रोभिजनिङ गरेको छ । जुन अघिल्लो वर्षको ४ अर्ब ३७ करोड ५३ लाख रुपैयाँ तुलनामा ४१.५५ प्रतिशतले बढी हो ।
.gif)
असार २०८३ सम्म बैंकको कुल निष्क्रिय कर्जा अनुपात ६.३५ प्रतिशतबाट बढेर ८.६६ प्रतिशत पुगेको छ । प्रोभिजनिङ कारण खुद नाफा घटेसँगै बैंकको प्रतिसेयर आम्दानी पनि अघिल्लो वर्षको १२.६९ रुपैयाँबाट घटेर ८.०५ रुपैयाँमा झरेको छ । बैंकको कुल वितरणयोग्य नाफा ५ अर्ब ८ करोड ७५ लाख रुपैयाँ ऋणात्मक (नोक्सानी) रहेको छ । यस अनुसार आर्थिक वर्ष २०८२/८३ को नतिजाबाट बैंकका सेयरधनीहरूले कुनै पनि लाभांश पाउने क्षमता देखिँदैन । बैंकको चुक्ता पुँजी ३४ अर्ब १२ करोड ८५ लाख मा स्थिर छ । जगेडा तथा अन्य कोष भने १५.३८ प्रतिशतले बढेर ३८ अर्ब ४३ करोड ३४ लाख पुगेको छ ।
नाफा घटे पनि जगेडा कोष बढेकाले प्रतिसेयर नेटवर्थ १९०.४० रुपैयाँबाट बढेर १९७.७१ रुपैयाँ पुगेको छ ।
