काठमाडौँ । सत्तारूढ पार्टीका सांसद खगेन्द्र सुनारले गत निर्वाचनमा नेपाल प्रहरीले खरिद गरेको जुत्ता, मोजा, कपडालगायतमा अनियमितता भएको भन्दै तत्काल छानबिन समिति गठन गर्न माग राखेका छन् । बुधबार बसेको लेखा समिति बैठकमा बोल्दै प्रहरी महानिरीक्षक (आईजीपी) माथि प्रश्न उठिसकेको भन्दै सांसद सुनारले पदमै राखेर छानबिन नहुने पनि बताए । ‘तत्काल छानबिन समिति बनाउनुपर्छ, आरोपित मानिसहरूलाई जिम्मेवारीबाट बाहिर राख्नुपर्छ र निष्पक्ष ढङ्गले छानबिन गरिनुपर्छ’, सुनारको भनाइ छ ।
.gif)
प्रहरीका लागि खरिद गरिने जुत्ता, मोजा, कपडा तथा अन्य सामग्रीमा अनियमितता हुँदा त्यसको प्रत्यक्ष असर गरिब तथा निम्न वर्गबाट भर्ती भएका प्रहरी र म्यादी प्रहरीमाथि पर्ने बताए । सांसद सुनारले तत्कालीन गृहमन्त्री, गृह सचिव र प्रहरी महानिरीक्षकलाई जिम्मेवारीबाट अलग गर्नुपर्ने धारणा समेत राखेका छन् ।
‘आरोप लागेका व्यक्ति पदमै बसेर आफू विरुद्धको छानबिनमा प्रभाव पार्न सक्छ । बर्दी लाएर बसेर ल मलाई छानबिन गर भन्न पाइँदैन । सम्बन्धित ठेकेदार र प्रहरी अधिकारीबिचको सम्भावित सम्पर्क तथा आर्थिक कारोबारसमेत अनुसन्धानको दायरामा ल्याउनुपर्छ’, सुनारको भनाइ छ । बैठकमा आईजीपी कार्की, गृह सचिव श्रेष्ठ लगायतको उपस्थिति रहेको थियो । गत फागुन २१ को निर्वाचनमा निर्वाचन प्रहरीको पोसाक खरिदमा ६० करोड हिनामिना भएको भन्दै लेखा समितिमा उजुरी परेको थियो ।
