बेइजिङ । अमेरिकाले १० वटा चिनियाँ कम्पनीलाई घरेलु चिप निर्माता कम्पनी एनभिडियाको शक्तिशाली एआई चिप एनभिडिया एच२०० खरिद गर्न अनुमति दिएको छ । तर हालसम्म एउटा पनि चिप डेलिभरी नभएको बताइएको छ, जसले अमेरिका–चीन प्रविधि प्रतिस्पर्धाबीच ठूलो व्यापारिक सम्झौता अन्योलमा परेको संकेत गरेको छ ।यस विषयमा जानकारी भएका स्रोतहरूका अनुसार एनभिडियाका प्रमुख कार्यकारी अधिकृत जेनसेन हुआङ चीन भ्रमणमा रहेका बेला यो विषयमा प्रगति हुने अपेक्षा गरिएको छ । उनी सुरुमा अमेरिकी प्रतिनिधिमण्डलको सूचीमा थिएनन्, तर राष्ट्रपति डोनाल्ड ट्रम्पको निमन्त्रणापछि भ्रमणमा सहभागी भएका थिए ।
.gif)
स्रोतका अनुसार ट्रम्पले अलास्कामा हुआङलाई भेटेपछि उनलाई चिनियाँ राष्ट्रपति सी जिनपिङसँगको शिखर वार्तामा सहभागी गराएका थिए । यसले चीनमा एच२०० चिप बिक्रीसम्बन्धी रोकिएको प्रक्रिया अघि बढ्ने आशा बढाएको छ ।अमेरिकी निर्यात नियन्त्रण कडा हुनु अघि एनभिडियाले चीनको उन्नत चिप बजारको करिब ९५ प्रतिशत हिस्सा ओगटेको थियो । चीनबाट मात्रै कम्पनीको करिब १३ प्रतिशत आम्दानी आउने गरेको थियो । हुआङले यसअघि चीनको एआई बजार यस वर्ष ५० अर्ब डलर बराबर पुग्ने अनुमान गरेका थिए । स्रोतका अनुसार अमेरिकी वाणिज्य विभागले अलिबाबा, टेन्सेन्ट, बाइटडान्स र जेडीडटकमलगायत चिनियाँ कम्पनीलाई एच२०० चिप खरिद गर्न स्वीकृति दिएको छ ।
