काठमाडौँ । प्रतिनिधि सभा अन्तर्गतको कृषि, सहकारी तथा प्राकृतिक स्रोत समितिले विभिन्न विषयगत क्षेत्रको अध्ययन तथा प्रतिवेदन तयारीका लागि सात सदस्यीय उपसमिति गठन गरेको छ। समितिका सभापति अशोक चौधरीको अध्यक्षतामा बसेको बैठकले प्रादेशिक प्रतिनिधित्व र विषयगत विशिष्टतालाई ध्यानमा राख्दै उक्त उपसमिति गठन गरेको हो।उपसमिति गठनका क्रममा सभापति चौधरीले केवल प्रतिनिधित्व मात्र नभई सम्बन्धित विषयमा अध्ययन गरी ठोस प्रतिवेदन तयार पार्न सदस्यहरूको चयन गरिएको स्पष्ट पारेका छन्। नवगठित उपसमितिमा डा. सुजता तामाङ, खगेन्द्र कर्ण, ज्ञानेन्द्र महत, गङ्गा लक्ष्मी अवाल, चन्देश्वर मण्डल, ताहिर अली बार र प्रेमबहादुर बयक सदस्य रहेका छन्।
.gif)
समितिले कृषि, वन लगायतका क्षेत्रका लागि आवश्यकताअनुसार आगामी दिनमा थप उपसमितिहरू समेत निर्माण गर्दै लैजाने लक्ष्य राखेको छ। उपसमितिको गठनसँगै समितिको बैठक आगामी जेठ १ गते बिहान ११ बजे पुनः बस्ने गरी स्थगित भएको छ। यो उपसमितिले आफ्नो कार्यक्षेत्रभित्र रहेका विषयहरूको विस्तृत अध्ययन गरी समितिमा प्रतिवेदन बुझाउनेछ।
