लण्डन । बेलायती प्रधानमन्त्री सर कियर स्टार्मरको भविष्यलाई लिएर सरकारको माथिल्लो तहमा तीव्र मतभेद उत्पन्न भएको छ। प्रधानमन्त्रीले आफ्नो राजीनाको समयतालिका सार्वजनिक गर्नुपर्ने माग गर्दै ६ जना संसदीय निजी सचिव (पीपीएस) हरूले पद त्यागेका छन्। पद छाड्नेहरूमा स्वास्थ्य मन्त्री वेस स्ट्रिटिङका सहयोगी जो मोरिस, उपप्रधानमन्त्री डेभिड लामीकी सहयोगी मेलानी वार्ड, क्याबिनेट अफिस मन्त्री ड्यारेन जोन्सकी सहयोगी नौशाबाह खान र वातावरण मन्त्री एम्मा रेनोल्ड्सका सहयोगी टम रुटल्याण्ड रहेका छन्।
.gif)
यस्तै, मन्त्री प्याट म्याकफ्याडेनका सहयोगी गोर्डन म्याक्की र गृहमन्त्री शबाना महमूदकी सहयोगी सैली जेमिसनले पनि प्रधानमन्त्रीको बहिर्गमनका लागि समयतालिका माग गरेका छन्। पद त्याग गर्ने जो मोरिसले प्रधानमन्त्रीले ‘अब जनताको विश्वास र भरोसा गुमाइसकेको’ बताएका छन्। मोरिसका अनुसार स्थानीय निर्वाचनमा लेबर पार्टीका काउन्सिलर र उम्मेदवारहरूले आफूले नगरेको निर्णयको सजाय भोग्नुपरेको छ।राजीनामाको माग गर्ने लेबर सांसदहरूको सङ्ख्या ७२ पुगेको छ। गृहमन्त्री शबाना महमूद लगायतका केही मन्त्रीहरूले पनि स्टार्मरलाई राजीनामाको मिति तोक्न दबाब दिइरहेका छन्, यद्यपि महमूद क्याबिनेटभित्र अल्पमतमा रहेको बुझिएको छ। अर्कोतर्फ, म्यानचेस्टरका मेयर एण्डी बर्नहमका समर्थकहरू र दक्षिणपन्थी धारका नेताहरूबाट पनि स्टार्मरमाथि दबाब बढिरहेको छ।
बेलायतको स्थानीय निर्वाचनमा लेबर पार्टीले करिब १,५०० काउन्सिलर पद गुमाउनुका साथै वेल्स र स्कटल्याण्डमा इतिहासकै खराब नतिजा व्यहोरेपछि यो सङ्कट निम्तिएको हो। चौतर्फी दबाबका बिच प्रधानमन्त्री स्टार्मरले भने आफूले ‘ठुला राजनीतिक निर्णयहरू सही गरेको’ दाबी गर्दै तत्काल राजीनामा नदिने अडान लिएका छन्। उनले सरकारबाट केही गल्ती भएको स्वीकार गर्दै आफूले आलोचकहरूलाई गलत साबित गरेरै छाड्ने बताएका छन्।
