वाशिङगटन डीसी । इरानले स्ट्रेट अफ होर्मुज बन्द गरेपछि अमेरिकी कच्चा तेलको माग उल्लेखनीय रूपमा बढेको विश्लेषकहरूले बताएका छन् । यो जलमार्ग खाडी क्षेत्रको तेल आपूर्तिको लागि अत्यन्तै महत्त्वपूर्ण मानिन्छ । आफ्नो सामाजिक सञ्जाल ट्रुथ सोसलमा पोस्ट गर्दै डोनाल्ड ट्रम्पले इरानी नेतृत्वले सयौँ जहाजहरूलाई टेक्सास, लुइजियाना र अलास्काजस्ता तेलसम्पन्न अमेरिकी राज्यतर्फ मोडिएको बताएका छन् ।उनले कुन प्रकारका जहाजबारे उल्लेख गरेका हुन भन्ने स्पष्ट छैन । तर शिपिङ तथा व्यार विश्लेषकहरूले बीबीसी भेरिफाईलाई बताएअनुसार स्ट्रेट बन्द भएपछि अमेरिकी कच्चा तेलप्रति माग बढेको छ । यो अवस्था इरानमा अमेरिका र इजरायलको युद्ध सुरु भएपछि अझ जटिल बनेको हो । फेब्रुअरी २८ देखि सुरु भएको द्वन्द्वका कारण जलमार्ग हुँदै हुने ढुवानी गम्भीर रूपमा प्रभावित भएको छ ।
.gif)
मध्यपूर्वबाट तेल आयात गर्न नसक्ने भएपछि युरोप र एसियाका खरिदकर्ताहरूले वैकल्पिक स्रोत खोज्न थालेका छन् । समुद्री डाटा कम्पनी केप्लरका अनुसार हाल ७१ वटा ठूला तेल ट्यांकर अमेरिका जाँदैछन् । गत वर्ष औसतमा यो संख्या २७ मात्र थियो । आर्गस मिडियाका विशेषज्ञ डेभिड हेडन भन्छन्, “युरोप र एसियाका खरिदकर्ताहरूले अमेरिकी गल्फ क्षेत्रबाट तेल लोड गर्न सजिलो र पर्याप्त विकल्पका रूपमा हेरेका छन् ।” यसको प्रभावस्वरूप अमेरिकी कच्चा तेल निर्यातमा वृद्धि देखिएको छ। समुद्री अनुसन्धान परामर्शदाता ड्रयूरीका अनुसार अप्रिल १० मा समाप्त भएको हप्तामा निर्यात ५२ लाख ब्यारेल प्रतिदिन पुगेको छ, जुन सात महिनाकै उच्च स्तर हो ।
