काठमाडौँ । जर्मनीमा १७ देखि ४५ वर्ष उमेर समूहका पुरुषहरूले लामो समय विदेश बस्नुअघि सैन्य अनुमति लिनुपर्ने व्यवस्था लागू गरिएको छ । स्वेच्छिक सैनिक सेवा प्रणालीलाई पनि समेटेको नयाँ कानुनअन्तर्गत यो व्यवस्था आएको हो ।नयाँ सैन्य सेवा आधुनिकीकरण ऐनअनुसार जनवरी १ देखि लागू भएको नियमले विशेष गरी तीन महिनाभन्दा बढी विदेश बसाइँका लागि पूर्वस्वीकृति आवश्यक बनाएको छ। जर्मन रक्षा मन्त्रालयका प्रवक्ताले बीबीसीलाई दिएको जानकारीअनुसार १७ वर्षभन्दा माथिका पुरुषहरूले विदेशमा लामो समय बस्नुअघि अनुमति लिनुपर्ने हुन्छ । यो नियमको उद्देश्य विश्वसनीय र प्रभावकारी सैनिक अभिलेख प्रणाली सुनिश्चित गर्नु रहेको जनाइएको छ । “आपतकालीन अवस्थामा विदेशमा लामो समय बस्ने व्यक्तिहरूको अवस्थाबारे जानकारी हुनु आवश्यक हुन्छ,” प्रवक्ताले भनेका छन् ।
.gif)
यो कानुनी व्यवस्था भर्ती ऐन १९५६ मा आधारित छ, जसलाई पछिल्लो पटक गत डिसेम्बरमा संशोधन गरिएको थियो । यसअघि यस्तो नियम राष्ट्रिय आपतकाल वा सैनिक परिचालनको अवस्थामा मात्र लागू हुने गरेको थियो । यद्यपि हालको कानुनअनुसार यात्रा अनुमति सामान्यतया दिइने अपेक्षा गरिएको छ, तर नियम उल्लङ्घन भएमा कसरी कार्यान्वयन गरिनेछ भन्ने स्पष्ट छैन ।यो विषय फ्र्याङ्कफर्टर रुन्डस्चाउले रिपोर्ट गरेपछि मात्र व्यापक रूपमा सार्वजनिक ध्यानमा आएको हो । यसले युवाहरूमा दूरगामी असर पार्न सक्ने स्विकार्दै अनावश्यक झन्झटबाट बच्न छुटसम्बन्धी नियमहरू पनि तयार गरिँदै गरेको रक्षा मन्त्रालयले जनाएको छ । उक्त कानुनले जर्मनीको सक्रिय सैन्य जनशक्ति करिब १ लाख ८० हजारबाट बढाएर सन २०३५ सम्म २ लाख ६० हजार पुर्याउने लक्ष्यसमेत राखेको छ।
