कुवेत सिटी । कुवेतले इरानी ड्रोन आक्रमणका कारण आफ्नो तेल क्षेत्र, विद्युत् संरचना र सरकारी कार्यालयहरूमा क्षति पुगेको जनाएको छ । कुवेत पेट्रोलियम कर्पोरेसनका अनुसार राजधानीस्थित शुवैख तेल क्षेत्र परिसरमा ड्रोन आक्रमणपछि आगलागी भएको थियो । उक्त कम्प्लेक्समा कुवेतको तेल मन्त्रालय तथा केपीसी मुख्यालय अवस्थित छन् । कुवेती सरकारी सञ्चारमाध्यमले कुवेतको अर्थ मन्त्रालयलाई उद्धृत गर्दै जनाएअनुसार अर्को इरानी ड्रोनले विभिन्न मन्त्रालयका कार्यालय रहेको भवनमा प्रहार गर्दा ठुलो भौतिक क्षति भएको छ । यद्यपि, यी आक्रमणमा कुनै मानवीय क्षति भने नभएको बताइएको छ । त्यसैगरी, कुवेतको विद्युत् तथा जल मन्त्रालयका अनुसार दुईवटा विद्युत् उत्पादन इकाइहरू बन्द गर्नुपरेको छ । इरानी ड्रोनले लक्षित गरेका विद्युत् र जल प्रशोधन (डिसेलिनेशन) केन्द्रहरूमा पनि उल्लेखनीय क्षति पुगेको छ ।
.gif)
सरकारी स्रोतका अनुसार यी सबै घटनामा कुनै पनि घाइते वा मृत्यु भएको छैन । यी आक्रमणहरू इरानविरुद्ध अमेरिका र इजरायलले सुरु गरेको युद्ध छैटौँ हप्तामा प्रवेश गरिरहेका बेला भएका हुन् । उक्त द्वन्द्व विस्तार हुँदै जाँदा इरानले इजरायलसँगै अमेरिकी सैन्य उपस्थिति भएका खाडी राष्ट्रहरूलाई पनि निशाना बनाउँदै आएको छ । घटनाबारे इरानले भने कुनै आधिकारिक प्रतिक्रिया दिएको छैन ।
