काठमाडौँ । अष्ट्रेलियामा रहेका नेपाली समुदायबाट सङ्कलित चन्दाको सम्भावित दुरुपयोगको विषयले अहिले सामाजिक सञ्जालमा तीव्र बहस सिर्जना गरेको छ। जेन–जेन्ड विरोध प्रदर्शनका क्रममा पीडितहरूको सहयोगका लागि उठाइएको रकम पारदर्शी रूपमा प्रयोग नभएको आशंका व्यक्त गरिएको हो।
.gif)
लोकप्रिय फेसबुक पेज रुटिन अफ नेपाल बन्द मार्फत यो विषय सार्वजनिक भएको हो। पेजका प्रशासक भिक्टर पौडेलले चन्दा सङ्कलनसँग सम्बन्धित गतिविधिहरूमा अनियमितता हुन सक्ने संकेत गर्दै सत्यतथ्य बाहिर ल्याउन आवश्यक रहेको बताएका छन्।
अष्ट्रेलियाबाट अर्थसमाचारका लागि संवाददाता शिव न्यौपानेका अनुसार त्यहाँ रहेका नेपालीहरूले पीडितहरूको सहयोगका लागि उदारतापूर्वक आर्थिक सहयोग पठाएका थिए। तर उक्त रकम कसरी र कहाँ प्रयोग भयो भन्नेबारे स्पष्ट विवरण सार्वजनिक नभएको भन्दै प्रश्न उठ्न थालेका छन्।
यस विषयमा थप छानबिन आवश्यक रहेको जनाउँदै सम्बन्धित निकायमा उजुरी दर्ता गराउने तयारी भइरहेको स्रोतले जनाएको छ। आवश्यक परेमा यो प्रकरण अख्तियार दुरुपयोग अनुसन्धान आयोग सम्म लैजान सकिने चर्चा पनि छ।
सामाजिक उत्तरदायित्वको विषयसँग जोडिएको यस घटनामा पारदर्शिता र जवाफदेहिता अपरिहार्य रहेको सरोकारवालाहरूको भनाइ छ। सहयोगदाताहरूले आफ्नो दान सही ठाउँमा प्रयोग भएको सुनिश्चितता खोजिरहेका छन्।
विशेषगरी युवाहरूको संलग्नता रहेको आन्दोलनसँग जोडिएको यस प्रकरणमा कुनै पनि प्रकारको दुरुपयोग भएको पाइए दोषीलाई कारबाही गर्नुपर्ने माग बढ्दो छ।
