वासिङ्टन डीसी । अमेरिकाका सहयोगी देशहरूले स्ट्रेट अफ हर्मुजमा हालैका तनावप्रति चासो व्यक्त गरेका छन् । बेलायत, फ्रान्स, जर्मनी, इटाली, नेदरल्याण्ड्स, जापान र क्यानडाका शीर्ष नेताहरूले संयुक्त वक्तव्य जारी गर्दै इरानलाई स्ट्रेट अफ हर्मुजमा खतरा उत्पन्न गर्न, माइन बिछ्याउन, ड्रोन र मिसाइल आक्रमण तथा अन्य अवरोध तुरुन्त रोक्न आग्रह गरेका छन् । साथै यी देशहरूले स्ट्रेट अफ हर्मुजमा ढुवानी सुरक्षित बनाउन उपयुक्त प्रयासहरूमा योगदान दिन तयार रहेको पनि बताएका छन् ।यो वक्तव्य अमेरिकी राष्ट्रपति डोनाल्ड ट्रम्पले नेटो देशहरूलाई स्ट्रेट अफ हर्मुजको सुरक्षा गर्न असहयोग गर्नुलाई मूर्खतापूर्ण गल्ती भन्दै आलोचना गरेपछि आएको हो । जापान बाहेक वक्तव्यमा नाम भएका सबै देशहरू नेटोका सदस्य हुन् । नेताहरूले नागरिक पूर्वाधार, तेल तथा ग्यास प्रतिष्ठानमा आक्रमण तत्काल रोक्ने व्यापक प्रतिबन्ध लागु गर्न पनि आह्वान गरेका छन् ।
.gif)
अन्तर्राष्ट्रिय जलमार्गमा इरानको हस्तक्षेपलाई यिनीहरूले अन्तर्राष्ट्रिय शान्ति र सुरक्षा माथि खतरा भनेका छन् । सुरक्षा प्रयासहरू के कस्ता हुन्छन् भन्ने स्पष्ट भएको छैन । तर, इटालीका रक्षा मन्त्री गुइडो क्रोसेट्टोले माइक्रोब्लगिङ वेबसाइट एक्समा पोष्ट गर्दै यो ‘युद्ध मिसन होइन’ भनेका छन् ।
