काठमाडौं । धादिङको बेनिघाट रोराङ गाउँपालिकामा पर्ने पृथ्वी राजमार्गको कृष्णभीरमा सडक भासिएको छ । लगातारको वर्षापछि सडक क्षेत्र करिव ३० मिटर भासिएपछि यातायात एकतर्फी सञ्चालन गरिएको छ ।
.gif)
असोज ११ र १२ गतेको वर्षातले अवरुद्ध भएको पृथ्वी राजमार्ग र त्रिभुवन राजपथ १५ गतेबाट दुइतर्फि सञ्चालन भएपनि कृष्णभिरमा सडक भासिएपछि सो क्षेत्रमा एकतर्फि रुपमा यातायात सञ्चालन गर्न वाध्य बनाएको धादिङका प्रमुख जिल्ला अधिकारी सुमन घिमिरेले बताउनुभयो ।
सडक भासिएपछि त्यसको अध्ययन गर्न जिल्ला प्रशासन कार्यालयको समन्वयमा भुगर्भ विदहरु कृष्णभीर पुगेका थिए । त्रिशुली किनारमा लगाइएको करिव २०० मिटर मेसिनरी वाल नदीले भत्काएपछि पाखो नै तानिएका कारण सडक भासिएको भुगर्व विद्हरुले बताएका छन् । नदीको वहावले क्रमश माटो काट्दै भित्र पस्दा सडकसम्मको भाग तानिएको उहाँहरुको भनाइ छ ।
विगतमा लामो समय कृष्णभिर पहिरो उपनामले परिचित सो क्षेत्र वायो इञ्जनीयरिङको रोफा प्रविधिबाट सुरक्षित गराइएको थियो । तर केहीदिन अघिको वर्षातले कमजोर बनाएका बेला मेशिनरी बाल भत्किएपछि सडकमुनिको पाखो नै भासिएको भुगर्व विदहरुले बताएका छन् ।
पहिरोको रोकथामका लागि नदीको सतह घटेपछि पुनः मेशिनरी बाल दिएर सुरक्षित गर्न पनि भूगर्वविदहरुले सुझाव दिएका छन् । मौसम विदहरुले अझै केहीदिन पानी पर्ने पूर्वानुमान गरेका कारण स्थिति जटिल बनेको छ । वैकल्पिक मार्ग प्रयोग गराउन समेत असम्भव रहेकाले मुलुकले नै सास्ती व्यहोर्नु पर्ने देखिएको छ । तत्कालका लागि यातायात सन्चालनमा सहजीकरण गर्न सो क्षेत्रमा प्रहरी परिचालन गरिएको ईलाका प्रहरी कार्यालय गजुरीका प्रमुख डिल्ली नारायण पाण्डेले बताउनुभयो ।
बुधबार प्रमु जिल्ला अधिकारी घिमिरेको नेतृत्वमा सबै सुरक्षा निकायका प्रमुखहरु, सडक विभाग लगायतका सरोकारवालाहरुको समूहले कृष्णभिर क्षेत्रको अनुगमन पनि गरेको थियो । अनुगमनपछि प्रजिअ घिमिरेले विषयको संवेदनशिलता बारे सडक विभाग र गृह मन्त्रालय मार्फत संघिय सरकारलाई जानकारी गराएको बताउनुभयो ।
