गोरखा, १८ माघ । अजिरकोट–१ घ्याच्चोककी ७४ वर्षकी सुबी गुरुङ आज दुई वर्षपछि पुनः आँखा देख्नु भएको छ । केही वर्षदेखि बायाँ आँखा कम देख्ने उहाँले दुई वर्षयता आँखै देख्न सक्नुभएको थिएन । 

यहाँ घ्याच्चोकस्थित घरबाट उहाँलाई छोरा कान्छा गुरुङले बोकेर अस्पताल सम्म पु¥याउनु भएको थियो । अस्पतालमा उहाँ जस्ता अन्य २६ जना मोतिया बिन्दुका बिरामीको सफल शल्यक्रिया भयो । शल्यक्रिया पछि आज बिहानै उहाँहरूलाई अस्पतालको छतमा लगियो । बिहानीको न्यायो घाममा सबैको आँखाको पट्टी खोलियो । पट्टी खोल्ने बित्तिकै त गुरुङ खुसीले फुरुङ्ग हुनुभयो । 

स्वास्थ्यकर्मीले आँखामा औषधि राखेर सफा गरिदिएपछि उहाँलाई कालो चस्मा लगाइदिए । बिस्तारै धमिलो धमिलो हुँदै आँखाको ज्योति फर्किएको गुरुङले बताउनुभयो । घर जाने बेलासम्म उहाँले मान्छे चिन्न थालिसक्नु भएको थियो । “अँ अहिले बिस्तारै देख्दै गएको जस्तो भयो है”, उहाँले खुसी हुँदै छोरासँग भन्नुभयो । 

छोराको सहारामा उपचार गर्न गएकी आमा पट्टी खोलेपछि ठिमठिम हिँडेरै घर जान तम्सिनु भयो । यो देखेपछि स्वास्थ्यकर्मीको टोलीले सम्झाउँदै भनेका थिए, “एकैपटक सबैतिर हेर्न हतार नगर्नु है, बिस्तारै आँखा खोल्नुपर्छ । आज भन्दा भोलि, पर्सि राम्रो देखिन्छ ।”

गुरुङले पनि आफूलाई संसार देखाइदिने डाक्टरतिर हेर्दै भन्नुभयो, “मलाई संसार देखाउनुभयो, धेरै धेरै धन्यवाद छ ।”

शिविरमा आएका अजिरकोट–३ डिहिटारका ९१ वर्षीय गुणनिधि अधिकारी पनि शल्यक्रियापछि आँखा देख्ने थालेपछि निकै खुसी हुनुहुन्छ । उहाँभन्दा धेरै खुसी छोरा काजिराम अधिकारी देखिनुहुन्थ्यो । शल्यक्रियापछि बुबा आँफैँ हिड्डुल गर्न सक्ने हुनुभएपछि सन्तोषले सास फेर्न पाएको काजिरामले बताउनु भयो ।

“बुढो मान्छे, त्यही माथि आँखा नदेख्ने भएपछि साह्रै बिजोग हुने रहेछ”, उहाँले भन्नुभयो, “अब त सबै देखेँ, हिँड्नसक्छु भन्नुभएको छ । यति भयो भने घरपरिवारलाई धेरै हलुका हुन्छ ।”

शिविरमा विगत केही वर्षदेखि आँखा नदेखेका सिम्जुङका ६३ वर्षीय पूर्णबहादुर तामाङ र मुच्चोकका ६५ वर्षीय नक्कले तामाङले पनि आँखा देख्न थाल्नुभएको छ । 

अजिरकोट गाउँपालिकाको आयोजना, मुटु फाउन्डेसन तथा  मनोज एसोसिएसन फ्रान्सको आर्थिक सहयोग र हिमालय आँखा अस्पताल पोखरा, रुइत फाउन्डेसन र आइ केयर फाउन्डेसनको प्राविधिक सहयोगमा भच्चेकमा निःशुल्क आँखा शिविर सञ्चालन गरिएको थियो ।

शिविरमा अजिरकोट गाउँपालिकाअन्तर्गतका सबै वडा तथा लमजुङको दूधपोखरी गाउँपालिका स्थानीय गरी ४१७ जनाले सेवा लिएका छन् । हिमालय आँखा अस्पताल पोखराका वरिष्ठ नेत्र रोग विषेशज्ञ डा ज्योत्सना शर्मा नेतृत्वको टोलीले शिविरमा सेवा दिएको हो ।