वासिङ्टन डिसी । मेटाको स्वामित्वमा रहेको म्यासेजिङ एप ह्वाट्सएपले आफ्ना प्रयोगकर्ताका लागि उच्च सुरक्षा प्रदान गर्ने ‘स्ट्रिक्ट अकाउन्ट सेटिङ्स’ फिचर सार्वजनिक गरेको छ। विश्वभर बढ्दै गएको साइबर आक्रमण र ह्याकिङको जोखिमलाई मध्यनजर गर्दै कम्पनीले मंगलबारदेखि यो नयाँ सुरक्षा प्रणाली लागू गरेको हो।ह्वाट्सएपको सेटिङ्समा उपलब्ध हुने यो ‘वान-क्लिक’ बटन एक्टिभ गरेपछि प्रयोगकर्ताले थप सुरक्षित अनुभव पाउनेछन्। यो मोड अन गरेपछि अपरिचित नम्बरबाट आउने फोटो, भिडियो र डकुमेन्टहरू ब्लक हुनेछन्। साथै, च्याटमा आउने लिङ्कहरूको प्रिभ्यु देखिने छैन र अपरिचित कलहरू स्वतः साइलेन्ट हुनेछन्। साइबर अपराधीहरूले विशेष गरी लिङ्क र मिडिया फाइलमार्फत जासुसी गर्ने गरेको पाइएकाले ह्वाट्सएपले यी फिचरमा कडाइ गरेको हो।
.gif)
ह्वाट्सएपले आफ्ना सबै कुराकानी ‘इन्ड-टु-इन्ड इन्क्रिप्सन’ बाट सुरक्षित भए पनि पत्रकार, मानवअधिकारवादी र सार्वजनिक व्यक्तित्वहरूका लागि यो थप सुरक्षा आवश्यक रहेको बताएको छ। यस्ता व्यक्तिहरू प्रायः अत्याधुनिक साइबर आक्रमणको निशानामा पर्ने भएकाले उनीहरूलाई लक्षित गरी यो फिचर ल्याइएको हो।प्रविधि क्षेत्रमा सुरक्षाको प्रतिस्पर्धा मेटा यस्तो उच्च सुरक्षा मोड ल्याउने तेस्रो ठूलो प्रविधि कम्पनी बनेको छ। यसअघि सन् २०२२ मा एप्पलले आइफोन प्रयोगकर्ताका लागि ‘लकडाउन मोड’ ल्याएको थियो भने गत वर्ष गुगलले एन्ड्रोइडका लागि ‘एडभान्स्ड प्रोटेक्सन मोड’ सुरु गरेको थियो। यी फिचरहरूले प्रयोगकर्तालाई केही सुविधाहरूमा सीमित गरे पनि सुरक्षाको हिसाबले निकै बलियो बनाउँछन्।सुरक्षा अनुसन्धानकर्ताहरूले ह्वाट्सएपको यो कदमलाई स्वागत गरेका छन्। द सिटिजन ल्याबका जोन स्कट-रेलटनले यो फिचरले विशेष गरी अभियन्ता र विपक्षी नेताहरूको सुरक्षामा ठूलो सहयोग पुग्ने विश्वास व्यक्त गरेका छन्। उनले अन्य प्रविधि कम्पनीहरूले पनि सुरक्षाका यस्तै उपायहरू अपनाउनुपर्ने सुझाव दिएका छन्।
