काठमाडौँ । असोज १८, विराटनगर नेपाल सरकारले भन्सार मूल्याङ्कन प्रक्रियामा ऐतिहासिक सुधारको थालनी गर्दै विराटनगर भन्सार कार्यालयबाट मूल्याङ्कन डेटाबेस प्रणालीको सफल परीक्षण गरेको छ। यो प्रणाली विश्व व्यापार संगठन अन्तर्गतको ग्याट सम्झौतामा आधारित अन्तर्राष्ट्रिय मान्यता प्राप्त विधि हो, जसले हाल प्रचलित सन्दर्भ पुस्तिकालाई विस्थापन गर्नेछ।
.gif)
अर्थमन्त्री रामेश्वर खनालद्वारा उद्घाटन गरिएको यस प्रणालीले व्यवसायीहरू बीच देखिँदै आएको सन्दर्भ मूल्यको विवाद तथा गुनासो सम्बोधन गर्ने अपेक्षा गरिएको छ। नयाँ प्रणाली अनुसार अब भन्सार जाँचपासमा आएका सबै वस्तुको मूल्य विवरण डिजिटल रुपमा संग्रह गरिनेछ, जसबाट मूल्यको विश्लेषण र वस्तुबीच तुलना सहज हुने सरकारको भनाइ छ।
नेपाल उद्योग वाणिज्य महासंघका अध्यक्ष चन्द्रप्रसाद ढकालले यो प्रणालीलाई पाइलट परियोजनाका रूपमा विराटनगरमा सुरू गरिएको उल्लेख गर्दै देशका सबै भन्सार विन्दुमा यसको विस्तारको माग गरेका छन्। उनले उद्यमी तथा व्यवसायीहरूलाई यो वैज्ञानिक मूल्याङ्कन विधिको अधिकतम उपयोग गर्न आग्रह गरे।
सरकारका अनुसार, प्रत्येक ६ महिनामा परिमार्जन हुने सन्दर्भ मूल्यलाई प्रतिस्थापन गर्ने यो अनलाइन प्रणालीले न्यूनबिजकीकरण र अधिक बिजकीकरण जस्ता समस्याको समाधानमा टेवा पुर्याउनेछ। विश्व व्यापार संगठनले मान्यता दिएको यो प्रणालीले नेपालमा पारदर्शी र विश्वसनीय भन्सार मूल्याङ्कन प्रणालीको आधार तयार गर्ने अपेक्षा गरिएको छ।
