काठमाडौँ । भदौ २६, गुल्मी बुधबार रातिदेखि परेको अविरल वर्षाका कारण गुल्मी जिल्लाको कालीगण्डकी करिडोर सडक अवरुद्ध भएको छ। कालीगण्डकी गाउँपालिका–२ स्थित राक्सेमा सडक माथिबाट पहिरो खसेपछि गुल्मी खण्ड अन्तर्गतको यो सडक पूर्ण रूपमा अवरुद्ध बनेको जिल्ला प्रहरी कार्यालय गुल्मीले जनाएको छ।
.gif)
प्रहरीचौकी पुर्तीघाटबाट खटिएको प्रहरी टोलीले बिहानैदेखि सडक खुलाउने प्रयास गरिरहेको भए पनि निरन्तर वर्षाका कारण काममा कठिनाइ भएको प्रहरी सूचना अधिकारी गङ्गाबहादुर सारुले जानकारी दिए।
सडक अवरुद्ध हुँदा पर्वत, बागलुङ, रिडी हुँदै पाल्पा र बुटवल जाने सवारीसाधन सञ्चालनमा आउन नसकेको छ। स्थानीय निर्माण कम्पनी कालिका कन्ट्रक्सनले पहिरो पन्छाउने उपकरण तयारी अवस्थामा राखेको बताइएको छ। वर्षा रोकिएलगत्तै सडक खुलाउने प्रयास तीव्र पारिने जनाइएको छ।
उक्त खण्डमा पहिरोका कारण पटक–पटक सडक अवरुद्ध हुने समस्या भइरहँदै आएको छ।
