काठमाडौं । व्यवसायी रामेश्वर थापाले बाराको सिमरामा पौने दुई अर्ब रुपैयाँ लगानीमा पाँचतारे होटेल सञ्चालनमा ल्याउने भएका छन् । उनले एक अर्ब ८८ करोड ६० लाख रुपैयाँ लगानीमा अन्नपूर्ण भिस्टा रिट्रिट पाँचतारे होटेल निर्माण गरिरहेका छन् ।उक्त होटेलमा एक अर्ब ५० करोड ९० लाख रुपैयाँ बैंकको ऋण र बाँकी ३७ करोड ७० लाख रकम संस्थापकको स्वपुँजी लगानी गरिनेछ । कुल लागतमध्ये ८० प्रतिशत बैंकको ऋण हुनेछ । २० प्रतिशत संस्थापकको स्वपुँजी हुने गरी लगानी संरचना बनाइएको छ ।

होटेल सन् २०२७ को जुलाई वा २०२८ को सुरुआतमा सञ्चालनमा ल्याउने तयारी रहेको विकासकर्ता कम्पनी अन्नपूर्ण भिस्टाले जनाएको छ ।निर्माणाधीन होटेलमा ११७ कोठा हुनेछन् । काम सुरु गरेको तीन वर्षभित्र होटेल सञ्चालनमा ल्याउने अन्नपूर्णको योजना छ । होटेल परियोजना निर्माणको प्रारम्भिक चरणमा रहेको कम्पनीले जनाएको छ ।होटेलमा फुड एन्ड वेभरेज, स्वीमिङ पुल, कन्फरेन्स एन्ड ब्यांक्वेट हल, स्पा र क्यासिनोलगायत सम्पूर्ण पाँचतारे सुविधा हुने अन्नपूर्णले जनाएको छ । होटेल पूर्वाधार ६ हजार वर्गमिटरमा फैलनेछ ।

होटेल सिमरा विमानस्थलबाट तीन किलोमिटर दूरीमा रहनेछ । त्यो नेपाल–भारत सीमा रक्सौलबाट २० किलोमिटर दूरीमा बनाइनेछ । निर्माणधीन होटेल विशेष गरी भारतीय पर्यटकलक्षित छ । त्यसले व्यापार र सीमापार वाणिज्यका निम्ति महत्त्वपूर्ण विन्दुका रूपमा काम गर्छ ।प्रकृति र वन्यजन्तुमा रुचि राख्ने आगन्तुकका निम्ति लोकप्रिय गन्तव्य पर्सा राष्ट्रिय निकुञ्जको नजिक भएका कारण बारामा पर्यटकको उच्च आवतजावत हुने गरेको छ ।अन्नपूर्ण भिस्टा गएको सेप्टेम्बरमा स्थापना गरिएको हो । यसमा थापाका साथै व्यवसायी राजेन्द्र केसी र दीपक पाण्डेको लगानी छ । थापा सिम्रिक एयर, अन्नपूर्ण मिडिया नेटवर्क, अन्नपूर्ण रेडियो र एपी वान टेलिभिजनका अध्यक्ष हुन् ।

अर्का सञ्चालक केसी पनि होटेल व्यवसायी हुन् । उनले ६ महिनाअघि राजधानीको बूढानीलकण्ठमा पाँचतारे होटेल लेमन ट्री प्रिमियर सञ्चालनमा ल्याएका छन् । उनी लेमन ट्रीका अध्यक्ष हुन् । केसी साउथ वेस्र्टन स्टेट कलेज र बूढानीलकण्ठ भ्यु टावरका पनि अध्यक्ष छन् ।अर्का सञ्चालक पाण्डे प्रभु लाइफ इन्स्योरेन्स कम्पनी लिमिटेडका सञ्चालक र गरिमा क्यापिटल लिमिटेडका अध्यक्ष हुन् ।अन्नपूर्णले एक अर्ब ५४ करोड रुपैयाँ ऋणको रेटिङ गराएको छ ।विभिन्न क्षेत्रमा फैलिएका संगठित र असंगठित ‘खेलाडी’को ठूलो संख्याको उपस्थितिले नेपालको होटेल उद्योगमा तीव्र प्रतिस्पर्धा छ । होटेल उद्योगमा व्यवसायस्तर र राजस्व घरेलु र विश्वव्यापी बजार दुवैमा समष्टिगत आर्थिक प्रवृत्तिका निम्ति संवेदनशील छ ।

होटेल परियोजनाको निर्माण अवधि लामो हुन्छ । प्रिमियम होटेल निर्माण गर्न तीनदेखि चार वर्ष लाग्छ । सञ्चालन स्थिरीकरण गर्न थप दुईदेखि तीन वर्ष लाग्न सक्छ । यसबाहेक प्रिमियम होटेलमा ठूलो लगानी आवश्यक पर्छ ।यसमा मध्यमस्तरका बजेट होटेलको तुलनामा लामो अवधि हुन्छ । ग्राहकलाई आकर्षित गर्न, अकुपेन्सीस्तर कायम राख्न, आफ्नो ब्रान्ड स्थापना गर्न र परिकल्पना गरिएअनुसार होटेलबाट लाभ उठाउन लामो समय लाग्ने देखिन्छ । होटेल सन् २०२८ देखि व्यावसायिक सञ्चालनमा ल्याइने योजना छ ।