काठमाडौंः परराष्ट्रमन्त्री आरजु राणा देउवाले देशको समग्र आर्थिक विकास र समृद्धिका लागि सरकारले काम गरिरहेको बताएकी छन् । नेपाल उद्योग वाणिज्य महासंघको ५९औँ वार्षिक साधारण सभा तथा उद्योग दिवस २०८१ को उद्घाटन गर्दै उनले निजीक्षेत्रको सहभागिता र सक्रियताबाट मात्र आर्थिक विकास सम्भव हुने धारणा राखेकी छन् ।
.gif)
निजीक्षेत्रले लगानी विस्तार नगरे समृद्धिको लक्ष्यमा पुग्न नसकिने बताउँदै उनले सरकारले निजीक्षेत्रलाई सहजीकरण गर्न विभिन्न नीतिगत तथा कानुनी जटिलता फुकाएको भन्दै निर्धक्क भएर लगानी विस्तार गर्न आग्रह गरेकी छन् ।
‘आर्थिक विकास र समृद्धिको बाधकका रूपमा देखिएको राजनीतिक अस्थिरतालाई चिर्न वर्तमान सरकार गठन भएको हो, ‘निजीक्षेत्रले काम गर्ने वातावरण बनेन भने मुलुकले समृद्धि हासिल गर्न भने सक्दैन । त्यसैले सरकार बनेदेखि नै आर्थिक समृद्धिका बाधक ऐन, कानुन परिमार्जन गर्ने प्रक्रिया अघि बढेको छ । अब निजीक्षेत्रले पनि बिना हिच्किचाहट ढ्क्कसाथ लगानी बढाउनुपर्छ । निजीक्षेत्रले नै अर्थतन्त्रलाई ड्राइभ गर्ने हो,’ परराष्ट्रमन्त्री राणाले उल्लेख गरिन् ।
उनले मुलुकको आर्थिक विकासका लागि औद्योगिक विकास अपरिहार्य रहेको उल्लेख गर्दै नेपालको तुलनात्मक लाभ भएका र प्रतिस्पर्धी क्षमता भएका वस्तु तथा सेवाहरूको उत्पादन, उत्पादकत्व तथा निर्यात वृद्धि गर्ने प्रमुख उद्देश्य राखेर काम गर्नुपर्ने आजको आवश्यकता रहेको बताइन् ।
यसैक्रममा मन्त्री राणाले पछिल्लो समय वैदेशिक सहायता केही कमी भए पनि निरुत्साहित नहुन निजीक्षेत्रलाई आग्रह गरिन् ।सरकार र निजीक्षेत्र मिलेर देशभित्र भएका स्रोत साधनको अधिकतम रूपमा प्रयोग गरी विकासको गति तीव्र बनाउनुपर्नेमा समेत मन्त्री राणाले उल्लेख गरिन् ।
