काठमाडौं । टौडल ब्याडमिन्टन क्लबको आयोजनामा फेस्टिभल कप राउन्ड रोबिन लिग डबल ब्याडमिन्टन प्रतियोगिता सञ्चालन हुने भएको छ । दसैँ तथा चाडपर्वको अवसरलाई लक्षित गरी आयोजना गर्न लागिएको प्रतियोगितामा सात टिमले प्रतिस्पर्धा गर्नेछन् ।
.gif)
आयोजकले सार्वजनिक गरेको खेलतालिकाअनुसार प्रतियोगिता असोज २६ गतेदेखि ३० गतेसम्म सञ्चालन हुनेछ । प्रतियोगितामा टिम ‘ए’, ‘बी’, ‘सी’, ‘डी’, ‘ई’, ‘एफ’ र ‘जी’ गरी सात टिम सहभागी हुनेछन् । प्रत्येक टिममा दुई खेलाडी रहनेछन् ।
राउन्ड रोबिन लिग प्रणालीमा सञ्चालन हुने प्रतियोगितामा सबै टिमले आपसमा प्रतिस्पर्धा गर्ने खेलतालिका तयार पारिएको छ । यस प्रणालीमा सहभागी टिमहरूले निर्धारित खेलहरू खेलेपछि प्राप्त नतिजाका आधारमा अंक गणना गरिनेछ । प्रतियोगितामा खेलाडीको प्रदर्शन, टिमबीचको प्रतिस्पर्धा र अंकतालिकाले उपाधि होडलाई रोचक बनाउने अपेक्षा गरिएको छ ।
आयोजकले सार्वजनिक गरेको खेलतालिका अनुसार असोज २६ गते पहिलो दिन चार खेल सञ्चालन हुनेछन् । पहिलो खेलमा टिम ‘ए’ र ‘बी’ बीच प्रतिस्पर्धा हुनेछ । दोस्रो खेलमा टिम ‘सी’ र ‘डी’, तेस्रो खेलमा टिम ‘ई’ र ‘एफ’ तथा चौथो खेलमा टिम ‘जी’ र ‘ए’ आमनेसामने हुनेछन्।
त्यस्तै, असोज २७ गतेदेखि ३० गतेसम्म पनि विभिन्न टिमबीच प्रतिस्पर्धा सञ्चालन हुनेछ । खेलतालिकामा प्रत्येक खेलका लागि रेफ्री तथा लाइन जजको जिम्मेवारीसमेत उल्लेख गरिएको छ । प्रतियोगितालाई व्यवस्थित र निष्पक्ष रूपमा सञ्चालन गर्न आयोजकले खेल अधिकारीहरूको जिम्मेवारी निर्धारण गरेको जनाएको छ।
प्रतियोगितामा सहभागी टिमहरूमा रमेश ढकाल र जगदीश बलामीको टिम ‘ए’, नरेश लामा र कमल पौडेलको टिम ‘बी’, सुजन पुडासैनी र सन्त कु. श्रेष्ठको टिम ‘सी’ रहेका छन् । त्यसैगरी माधव भट्ट र श्याम चन्द्र श्रेष्ठले टिम ‘डी’ बाट प्रतिस्पर्धा गर्नेछन्।
नारायण प्रसाद भट्ट र ईश्वरी अधिकारी टिम ‘ई’ मा रहेका छन् भने लेखनाथ निरौला र बलराम बलामी टिम ‘एफ’ मा सहभागी हुनेछन् । बुद्धिमान श्रेष्ठ र वीरेन्द्र बलामीले टिम ‘जी’ बाट प्रतिस्पर्धा गर्ने खेलतालिकामा उल्लेख छ।
प्रतियोगिताका खेल बिहान ५ः३० बजे सुरु हुने आयोजकले सार्वजनिक गरेको सूचनामा उल्लेख छ । बिहानको समयमा सञ्चालन हुने प्रतियोगिताले खेलाडीलाई प्रतिस्पर्धात्मक वातावरणमा आफ्नो खेलकौशल प्रस्तुत गर्ने अवसर प्रदान गर्नेछ।
ब्याडमिन्टन खेलको विकास, खेलाडीबीच आपसी सम्बन्ध विस्तार तथा चाडपर्वको अवसरमा खेलकुद गतिविधिलाई प्रोत्साहन गर्ने उद्देश्यले प्रतियोगिता आयोजना गर्न लागिएको आयोजकको खेलतालिकाबाट देखिन्छ । यस्ता प्रतियोगिताले स्थानीयस्तरमा खेलकुदप्रतिको आकर्षण बढाउनुका साथै नयाँ खेलाडीलाई समेत प्रतिस्पर्धाको अवसर प्रदान गर्न सहयोग पुग्ने अपेक्षा गर्न सकिन्छ।
प्रतियोगिताको कार्यक्रम संयोजक लेखनाथ निरौला रहेका छन् । आयोजकले सार्वजनिक गरेको खेलतालिका अनुसार प्रतियोगिता असोज ३० गतेसम्म सञ्चालन हुनेछ।
