काठमाडौं । हाम्रो पात्रोका प्रयोगकर्ताले प्रधानमन्त्री दैवी प्रकोप उद्धार कोषमा १ करोड २५ लाख रुपैयाँ सहयोग गरेका छन् ।नेपालमा हालै आएको विनाशकारी विपद्बाट प्रभावित परिवार तथा समुदायको राहत, पुनःस्थापना र पुनर्निर्माणमा सहयोग पुर्याउने उद्देश्यले उक्त रकम संकलन गरिएको हो ।हाम्रो पात्रो कम्युनिटीका तर्फबाट संकलित सहयोग रकम अर्थमन्त्री डा. स्वर्णिम वाग्लेलाई औपचारिक रूपमा हस्तान्तरण गरिएको छ । सहयोग रकमसँगै अभियानमा योगदान गर्ने सम्पूर्ण सहयोगीको नामावलीसमेत सरकारलाई बुझाइएको छ ।
.gif)
विदेशमा रहेका नेपालीले समेत सहज रूपमा राष्ट्रिय राहत अभियानमा योगदान गर्न सकून् भन्ने उद्देश्यले हाम्रो पात्रोले अभियानलाई सहजीकरण गरेको जनाएको छ । रकम पठाउँदा कुनै सेवा शुल्क नलिई प्रयोगकर्ताले गरेको सम्पूर्ण योगदान राहत कोषमा पुग्ने व्यवस्था मिलाइएको थियो ।हाम्रो पात्रोका संस्थापक तथा प्रमुख कार्यकारी अधिकृत शंकर उप्रेतीले १ करोड २५ लाख रुपैयाँ प्रयोगकर्ताको सामूहिक योगदान भएको बताए । उनले हाम्रो पात्रोले प्रयोगकर्ताको सहयोग सरकारसम्म पुर्याउने माध्यमको भूमिका मात्र खेलेको बताए ।“नेपाललाई आवश्यकता परेको समयमा संसारभर रहेका नेपालीहरूले देखाएको तत्परता, एकता र उदारताप्रति हामी अत्यन्त आभारी छौँ । सानो वा ठूलो, जुनसुकै रकम योगदान गर्ने प्रत्येक व्यक्तिलाई हामी हार्दिक धन्यवाद दिन चाहन्छौँ,” उनले भने ।
हाम्रो पात्रोले स्थापनाकालदेखि सूचना तथा डिजिटल सेवामार्फत नेपाली कम्युनिटीलाई जोड्दै आएको जनाएको छ । विपद्का बेला सामूहिक सहयोग जुटाउनसमेत भूमिका खेल्दै आएको हाम्रो पात्रो एप विश्वभर २ करोडभन्दा बढी पटक डाउनलोड भएको कम्पनीले जनाएको छ ।कम्पनीले अभियानमा सहभागी भई सहयोग गर्ने सम्पूर्ण प्रयोगकर्ताप्रति कृतज्ञता व्यक्त गर्दै विपद्बाट प्रभावित परिवार तथा समुदायप्रति ऐक्यबद्धता जनाएको छ ।
