हेटौँडा । बागमती प्रदेश सरकारले हेटौँडा–काठमाडौँ आवागमन सहज बनाउन भीमफेदी–कोगटे–ईपा–सिस्नेरी सडकलाई वैकल्पिक मार्गका रूपमा सञ्चालनमा ल्याउने तयारी थालेको छ ।
.gif)
पृथ्वी राजमार्गअन्तर्गत धादिङको कृष्णभिरमा पहिरोका कारण यातायात प्रभावित भएपछि हेटौँडा–काठमाडौँ जोड्ने वैकल्पिक सडकको आवश्यकता बढेको हो । प्रदेश सरकारले उक्त सडकको आवश्यक मर्मत तथा स्तरोन्नति गरी सवारी सञ्चालनयोग्य बनाउने प्रक्रिया अघि बढाएको जनाएको छ ।
बागमती प्रदेशका मुख्यमन्त्री किरण थापा मगरले मुख्य राजमार्गमा पटकपटक हुने अवरोधका कारण हेटौँडा–काठमाडौँ आवतजावत प्रभावित हुने समस्या समाधान गर्न वैकल्पिक सडकलाई प्राथमिकतामा राखिएको बताए ।
“मुख्य सडकमा हुने अवरोधका कारण यात्रुले पटकपटक समस्या भोग्नुपरेको छ । त्यसलाई न्यूनीकरण गर्न वैकल्पिक मार्गको विकासलाई प्राथमिकता दिएका छौँ,” मुख्यमन्त्री थापाले भने ।
मुख्यमन्त्री थापा, भौतिक पूर्वाधार विकासमन्त्री भरतबहादुर केसी, मन्त्रालयका सचिव ईश्वरचन्द्र मरहट्ठा तथा भीमफेदी गाउँपालिकाका अध्यक्ष हिदम लामासहितको टोलीले बिहीबार भीमफेदी–कोगटे–ईपा–सिस्नेरी सडकखण्डको स्थलगत निरीक्षण गरेको थियो ।
मुख्यमन्त्री थापाका अनुसार सडकको मर्मत तथा स्तरोन्नतिका लागि प्रदेश सरकारले चालु आर्थिक वर्षमै बजेट विनियोजन गरेको छ । सडकको वर्तमान अवस्था मूल्याङ्कन गरी तत्काल आवश्यक मर्मतका काम अघि बढाएर सवारी आवागमन सञ्चालनयोग्य बनाउने तयारी रहेको उनले बताए ।
प्रदेश सरकारका अनुसार उक्त सडक सञ्चालनमा आएपछि हेटौँडा–काठमाडौँ आवागमनका लागि थप वैकल्पिक मार्ग उपलब्ध हुनेछ । पृथ्वी राजमार्गलगायत मुख्य सडकमा पहिरो, बाढी वा अन्य कारणले यातायात अवरुद्ध हुँदा यात्रु तथा सवारीसाधनलाई वैकल्पिक मार्गबाट गन्तव्यतर्फ पठाउन सहज हुने अपेक्षा गरिएको छ ।
सडक सञ्चालनमा आएपछि हेटौँडा–काठमाडौँबीचको यातायात प्रणाली थप सुरक्षित र भरपर्दो बनाउन सहयोग पुग्ने प्रदेश सरकारको विश्वास छ ।
