काठमाडौं । नेपाल–चीन सीमाक्षेत्रमा आएको भीषण बाढीका कारण कैलाश–मानसरोवर यात्रामा गएका ६४४ जना यात्रु सम्पर्कविहीन भएको प्रारम्भिक विवरण सार्वजनिक भएको छ।
.gif)
प्रारम्भिक विवरणअनुसार सम्पर्कविहीन यात्रुमध्ये ३६२ जना पुरुष र ३१८ जना महिला रहेका छन्। बाढी तथा पहिरोका कारण सीमाक्षेत्रमा यातायात तथा सञ्चार सम्पर्क प्रभावित भएपछि तीर्थयात्रीहरू सम्पर्कविहीन भएको बताइएको छ।
सम्पर्कविहीन हुने यात्रुमा विभिन्न देशका नागरिक रहेका छन्। विवरणअनुसार १२७ जना नेपाली नागरिक रहेका छन्। त्यस्तै भारतका १७८ जना, अमेरिकाका ६५ जना, युक्रेनका ५३ जना र मलेसियाका ५१ जना यात्रु सम्पर्कविहीन भएको उल्लेख छ।
कैलाश–मानसरोवर यात्रामा रहेका अन्य विदेशी नागरिक समेत विपद्को प्रभावमा परेको बताइएको छ। यसै क्रममा रुसका दुई जना, बुल्गेरियाका एक जना र स्विट्जरल्याण्डका एक जना नागरिकको उद्धार गरिएको प्रारम्भिक विवरणमा उल्लेख छ।
नेपाल र चीनको सीमाक्षेत्रमा आएको भीषण बाढी तथा पहिरोका कारण कैलाश–मानसरोवर क्षेत्रतर्फ जाने तथा फर्किने तीर्थयात्रीहरूको आवागमन प्रभावित भएको छ। सडक तथा अन्य सम्पर्क मार्गमा अवरोध सिर्जना हुँदा यात्रुहरूको अवस्थाबारे तत्काल जानकारी लिन कठिनाइ भइरहेको बताइएको छ।
सम्पर्कविहीन यात्रुहरूको खोजी तथा उद्धारका लागि सम्बन्धित निकायले समन्वय गरिरहेका छन्। यद्यपि, प्रतिकूल मौसम, बाढीको तीव्र बहाव र प्रभावित क्षेत्रमा रहेको भौगोलिक कठिनाइका कारण उद्धार तथा खोजी कार्य चुनौतीपूर्ण बनेको छ।
कैलाश–मानसरोवर धार्मिक यात्राका लागि नेपाल हुँदै ठूलो संख्यामा स्वदेशी तथा विदेशी तीर्थयात्री जाने गर्छन्। पछिल्लो प्राकृतिक विपद्का कारण यात्रुहरूको सुरक्षामाथि गम्भीर प्रश्न उठेको छ भने प्रभावित क्षेत्रको वास्तविक अवस्था र सम्पर्कविहीन यात्रुहरूको अवस्थाबारे थप विवरण आउन बाँकी छ।
1787903758_Final-Detail-of-Missing-Person-11-am.pdf :To download file click here
