काठमाडौँ । राष्ट्रिय मानव अधिकार आयोगले विगत १२ दिनदेखि आमरण अनशनमा रहेका विनय यादवको स्वास्थ्य अवस्थाप्रति संवेदनशील बन्न सरकारलाई आग्रह गरेको छ । सुनसरीको देवानगञ्ज घटनाको निष्पक्ष छानबिन, पीडितलाई न्याय र सरकारसँग भएका पुराना सहमतिको कार्यान्वयनको माग राख्दै यादव माइतीघरमा अनशनरत छन् ।
.gif)
आयोगले गरेको अनुगमनका क्रममा लामो समयको अनशनका कारण यादवको शरीरमा सुगर र रक्तचाप घट्दै गएको र अवस्था गम्भीर बन्दै गएको पाइएको छ । अनशन सुरु भएको १२ दिन बितिसक्दा समेत सरकारका तर्फबाट स्वास्थ्य उपचार वा वार्ताका लागि कुनै पहल नभएकोमा आयोगले चिन्ता व्यक्त गरेको छ ।आयोगका प्रवक्ता डा. टीकाराम पोखरेलद्वारा जारी विज्ञप्तिमा अनशनरत व्यक्तिको प्रभावकारी स्वास्थ्य उपचारको व्यवस्था गरी जीवन रक्षा गर्न र वार्ताको माध्यमबाट समस्याको समाधान खोज्न नेपाल सरकारलाई विशेष आग्रह गरिएको छ ।
