काठमाडौँ, ९ असार । नेपाल राष्ट्र बैंकले वित्तीय साक्षरता तथा सुरक्षित बैंकिङ व्यवहार प्रवर्द्धन गर्ने उद्देश्यले वित्तीय चेतनासम्बन्धी नयाँ सन्देश जारी गरेको छ। राष्ट्र बैंकले डिजिटल बैंकिङ, बचत, लगानी र वित्तीय कारोबारमा नागरिकलाई सचेत र जिम्मेवार बन्न आग्रह गरेको हो।
.gif)
केन्द्रीय बैंकका अनुसार पछिल्लो समय मोबाइल बैंकिङ, इन्टरनेट बैंकिङ, डिजिटल वालेट तथा विद्युतीय भुक्तानी प्रणालीको प्रयोग तीव्र रूपमा बढ्दै गएको छ। डिजिटल प्रविधिको विस्तारसँगै वित्तीय ठगी, साइबर अपराध तथा अनधिकृत कारोबारको जोखिम पनि बढेकाले प्रयोगकर्ताले विशेष सावधानी अपनाउन आवश्यक रहेको राष्ट्र बैंकले जनाएको छ।
राष्ट्र बैंकले बैंक खाता, एटिएम कार्ड, पिन नम्बर, ओटीपी कोड तथा मोबाइल बैंकिङ पासवर्डजस्ता गोप्य जानकारी कसैलाई पनि नदिन आग्रह गरेको छ। अपरिचित व्यक्तिको फोन, सन्देश वा सामाजिक सञ्जालमार्फत आउने लोभलाग्दा प्रस्तावमा विश्वास नगर्न र कुनै शंकास्पद गतिविधि देखिए तत्काल सम्बन्धित बैंक वा वित्तीय संस्थालाई जानकारी गराउन सुझाव दिइएको छ।
त्यसैगरी व्यक्तिगत आम्दानी अनुसार बचत गर्ने बानी विकास गर्न, अनावश्यक ऋणबाट बच्न तथा वित्तीय योजना बनाएर खर्च व्यवस्थापन गर्न पनि राष्ट्र बैंकले आग्रह गरेको छ। बचत, लगानी र ऋणसम्बन्धी निर्णय गर्दा आधिकारिक स्रोतबाट जानकारी लिएर मात्र अघि बढ्नुपर्ने सन्देशमा उल्लेख गरिएको छ।
राष्ट्र बैंकले वित्तीय पहुँचसँगै वित्तीय चेतना पनि उत्तिकै आवश्यक रहेको उल्लेख गर्दै वित्तीय रूपमा सचेत नागरिकले मात्रै सुरक्षित र समृद्ध आर्थिक जीवन निर्माण गर्न सक्ने जनाएको छ। वित्तीय साक्षरताको विस्तारले व्यक्तिगत आर्थिक अवस्था सुधार्नुका साथै समग्र अर्थतन्त्रलाई समेत सबल बनाउन महत्वपूर्ण भूमिका खेल्ने विश्वास राष्ट्र बैंकले व्यक्त गरेको छ।
राष्ट्र बैंकले आगामी दिनमा पनि देशभर वित्तीय साक्षरता अभियान सञ्चालन गर्दै नागरिकलाई सुरक्षित, जिम्मेवार र आधुनिक वित्तीय प्रणालीसँग जोड्ने कार्यक्रमलाई निरन्तरता दिने जनाएको छ।
