काठमाडौं । नेपालमा उपभोक्ता महँगीको दर बढेर पाँच प्रतिशत नाघेको छ । नेपाल राष्ट्र बैंकका अनुसार, वैशाख महिनामा वार्षिक विन्दुगत मुद्रास्फीति ५.०४ प्रतिशत पुगेको छ । अघिल्लो वर्ष सोही अवधिमा यो दर २.७७ प्रतिशत थियो ।
फलफूल, घ्यू तथा तेल, तरकारी र मासुजन्य वस्तुको मूल्य बढ्दा खाद्य तथा पेय पदार्थ समूहको मुद्रास्फीति ४.६३ प्रतिशत पुगेको छ । गैर–खाद्य तथा सेवा समूहको मुद्रास्फीति ५.२६ प्रतिशत रहेको छ ।प्रदेशगत रूपमा कोसी प्रदेशमा सबैभन्दा बढी ५.६४ प्रतिशत मुद्रास्फीति रहेको छ । हिमाली क्षेत्रको मुद्रास्फीति भने तुलनात्मक रूपमा कम रहेको राष्ट्र बैंकले जनाएको छ ।
