बुटवल । दाङस्थित राप्ती स्वास्थ्य विज्ञान प्रतिष्ठानमा युरोलोजी सेवा सुरु भएपछि सेवा प्रभावकारी बन्दै गएको छ। प्रतिष्ठानमा युरोलोजी सेवा सुरु भएको जेठ महिनादेखि असोज मसान्तसम्म २ सय ७७ जना बिरामीले उपचार लिएका छन्।प्रतिष्ठानका युरोलोजिष्ट सर्जन डा. सुशिल खनियाँको नेतृत्वमा चिकित्सक डा. विवेक थापा, डा. पङ्कज नेपालीसहितको टोलीले सानादेखि ठुला शल्यक्रियाहरू नियमित रूपमा गर्दै आएको छ।
.gif)
प्रतिष्ठानको तथ्याङ्क अनुसार युरोलोजी ओपीडीमा दैनिक ७० भन्दा बढी बिरामीले परामर्शसहितको स्वास्थ्य सेवा लिइरहेका छन्। यसअघि युरोलोजी सेवा नहुँदा दाङका बिरामीहरूलाई बुटवल वा नेपालगन्ज पुगेर उपचार गर्नुपर्ने बाध्यता थियो। अत्याधुनिक उपकरणसहित सेवा विस्तार भएपछि अहिले उक्त समस्या समाधान भएको प्रतिष्ठानले जनाएको छ।डा. खनियाका अनुसार १ सय ५७ जना बिरामीको मिर्गौलामा भएको गम्भीर प्रकारको पत्थरीको शल्यक्रिया गरिएको छ भने २२ जना मध्यम प्रकृतिका र ९९ जना बिरामीको सामान्य शल्यक्रिया गरिएको छ।
युरोलोजी सेवाअन्तर्गत पिसाबसम्बन्धी समस्या, प्रोस्टेट, मिर्गौला र पित्तथैलीको पत्थरी, पिसाब नलीसम्बन्धी रोग, अण्डकोषमा मासु पलाउने वा सुन्निने, पिसाब पोल्ने, चुहिने जस्ता विभिन्न समस्याको उपचार सेवा उपलब्ध रहेको डा. खनियाले बताए।प्रतिष्ठानमा युरोलोजी सेवा लिने बिरामीको सङ्ख्या दिनप्रतिदिन बढ्दै गएको उनले जनाए। प्रतिष्ठानका निमित्त अस्पताल निर्देशक प्रा. डा. जनार्दन पन्थीका अनुसार युरोलोजी सेवा हाल अत्यन्त प्रभावकारी र जनमुखी बनेको छ।
