काभ्रेपलाञ्चोक, असोज १७, भारी वर्षा र सम्भावित विपद्को जोखिमलाई मध्यनजर गर्दै बीपी राजमार्ग बिहिबार बेलुकी ५ बजेदेखि बिहान ५ बजेसम्मका लागि बन्द गरिने भएको छ।
.gif)
जिल्ला प्रशासन कार्यालय काभ्रेपलाञ्चोकले असोज १७ देखि २० गतेसम्म अत्यधिक वर्षाको सम्भावना रहेको भन्दै (असोज १६) बाट असोज २१ गते मंगलबार सम्म रातिको समयमा राजमार्ग बन्द गर्ने निर्णय गरेको हो। यो अवधिमा एम्बुलेन्स र अत्यावश्यक सेवाका सवारीसाधन बाहेक अन्य सबै सार्वजनिक तथा निजी यात्रुवाहक सवारीको आवागमनमा रोक लगाइनेछ।
प्रमुख जिल्ला अधिकारी उमेश कुमार ढकालद्वारा जारी सूचनामा यात्रु र स्थानीयवासीलाई उच्च सतर्कता अपनाउन आग्रह गरिएको छ। रोशी खोला र अन्य खहरे खोलामा आकस्मिक बाढीको सम्भावना रहेकाले आवश्यक परेमा दिनको समयमा पनि प्रहरीले सवारीसाधन रोक्न सक्ने व्यवस्था गरिएको जनाइएको छ।
प्रशासनले अनावश्यक यात्रा नगर्न, विशेषगरी रातको समयमा बाहिर ननिस्कन, पहिरो सम्भावित स्थान र नदीकिनारमा विशेष सतर्कता अपनाउन अनुरोध गरेको छ। डुबानको जोखिम रहेका बस्तीहरूलाई सुरक्षित स्थानमा सार्न स्थानीय तहलाई पूर्वतयारी गर्न निर्देशन दिइएको छ।
साथै, सम्भावित विपद् व्यवस्थापनका लागि सुरक्षा निकाय, स्थानीय तह, स्वयंसेवक तथा सम्बन्धित निकायलाई स्वीकृत प्रतिकार्य योजना अनुसार तयारी अवस्थामा रहन निर्देशन दिइएको छ।
