काठमाडौँ । भदौ ३०, चाडपर्व नजिकिँदै जाँदा खाद्य व्यवस्था तथा व्यापार कम्पनीले सोमबार (भदौ ३१) देखि सहुलियत पसल सञ्चालन गर्ने निर्णय गरेको छ। पछिल्लो समय जेनजी आन्दोलन र त्यसपछिको अस्थिरताका कारण अन्योल बनेको भए पनि निषेधाज्ञा र कर्फ्यु हटेसँगै कम्पनीले पसल सञ्चालनको तयारी पूरा गरेको जनाएको छ।
.gif)
यस वर्ष ४५ जिल्लाका १११ स्थानहरूमा स्थायी तथा अस्थायी सहुलियत पसल सञ्चालन गरिनेछ। उपभोक्ताले स्थायी बिक्री केन्द्र, अस्थायी आउटलेट, तथा अनलाइन माध्यमबाट पनि सामग्री खरिद गर्न सक्नेछन्।
कम्पनीका अनुसार उपभोक्ताले निम्न छुट पाउनेछन्ः
चामल, चिनी, गेडागुडीमाः प्रतिकिलो रु. ५ छुट
खाने तेल, आटा, मैदा, चिउरामाः प्रतिकिलोलिटर रु. ७ छुट
चिउरा, जिरा–धनियामाः प्रतिकिलो रु. १० छुट
यद्यपि, खसीबोका र च्याङ्ग्राको सहुलियत बिक्री अझै अनिश्चित छ। कम्पनीका अनुसार यसका लागि स्थानीय तहसँगको समन्वय आवश्यक पर्ने भएकाले केही दिन प्रतीक्षा गर्नुपर्ने हुन्छ।
पहिले नै खसीबोका र च्याङ्ग्राको अग्रिम अनलाइन बुकिङ सुरु गरिएको थियो। तर, सामाजिक सञ्जाल बन्द भएपछि प्रक्रिया रोकिएको र त्यसपछिको आन्दोलनले स्थानीय तहसँग सम्पर्क टुटेकाले बिक्री सुरु गर्न ढिलाइ भएको कम्पनीले स्पष्ट पारेको छ।
