काठमाडौँ । भदौ ७, दाङ थारू समुदायको महत्वपूर्ण सांस्कृतिक पर्व अट्वारीको अवसरमा लुम्बिनी प्रदेश सरकार र थारू बाहुल्य जिल्लाका स्थानीय तहहरूले भदौ ८ र ९ गते सार्वजनिक बिदा घोषणा गरेका छन्।
.gif)
थारू समुदायले यस वर्ष भदौ ८ र ९ गते अट्वारी पर्व मनाउने तयारी गरेका छन्। यस अवसरमा लुम्बिनी प्रदेश सरकारले दाङ, बाँके, बर्दिया, कपिलवस्तु, रुपन्देही र पश्चिम नवलपरासी जिल्लामा भदौ ८ गते सार्वजनिक बिदा दिएको छ। त्यसैगरी, दाङ जिल्लाका विभिन्न स्थानीय तहहरूले भदौ ९ गते पनि सार्वजनिक बिदा दिएका छन्।
घोराही उपमहानगरपालिकाका प्रमुख प्रशासकीय अधिकृत ऋषिराम केसीले एक सूचना जारी गर्दै, भदौ ९ गतेसम्म अट्वारी पर्व मनाइने भएकाले सो दिन सार्वजनिक बिदा दिइएको जानकारी दिनुभयो। यो निर्णय भदौ २ गते बसेको घोराही उपमहानगरपालिकाको १७७ औं कार्यपालिका बैठकबाट गरिएको हो। बैठकले अट्वारी र तीजको अवसरमा बिदा दिने निर्णय गरेको विज्ञप्तिमा उल्लेख गरिएको छ।
दंगीशरण गाउँपालिका, राजपुर गाउँपालिका, र अन्य स्थानीय तहहरूले पनि भदौ ९ गते अट्वारीको सार्वजनिक बिदा दिएको जनाएका छन्। दंगीशरण गाउँपालिका अध्यक्ष सम्भु गिरी र राजपुरका प्रमुख प्रशासकीय अधिकृत दशरथ बुढाले छुट्टाछुट्टै सूचना जारी गरी बिदाको जानकारी गराएका हुन्।
यता, लमही नगरपालिकाले भने भदौ १५ र १६ गते अट्वारी पर्वको बिदा दिने निर्णय गरेको छ। नगरप्रमुख जोखराज चौधरीका अनुसार, स्थानीय सांस्कृतिक परम्परालाई ध्यानमा राख्दै फरक मितिमा बिदा दिइएको हो।
थारू समुदायमा अट्वारी पर्व महिलाहरूले विशेष रूपमा मनाउने अष्टिम्की पर्वको दोस्रो आइतबार, अर्थात् कुशे औँसीपछिको पहिलो आइतबार, मनाइन्छ। यो पर्वमा महिलाहरू उपवास बसेर धार्मिक र सांस्कृतिक गतिविधिमा संलग्न हुन्छन्।
