काठमाडौँ । भदौ ७, वैदेशिक रोजगारीका लागि बेलायत (युके) पठाउने भन्दै आठ जनाबाट रु ४३ लाख ठगी गरेको अभियोगमा एक जना पक्राउ परेका छन्।
.gif)
पक्राउ पर्नेमा कास्कीको पोखरा महानगरपालिका–१४ स्थायी घर भई हाल ललितपुरको महालक्ष्मी नगरपालिका–२ मा बसोबास गर्दै आएका २९ वर्षीय बसन्त कार्की रहेका छन्। कार्कीलाई काठमाडौँ उपत्यका अपराध अनुसन्धान कार्यालयले पक्राउ गरी आज सार्वजनिक गरेको हो।
प्रहरीका अनुसार कार्की “शिक्षा खोज नेपाल” नामक संस्था सञ्चालन गर्दै आएका थिए, जसको कार्यालय नयाँ बानेश्वर, काठमाडौँमा रहेको छ। उनले बेलायत रोजगारीका लागि प्रक्रिया मिलाइदिने भन्दै विभिन्न व्यक्तिबाट रकम असुलेको खुलेको छ।
प्रहरी उपरीक्षक तथा कार्यालयका सूचना अधिकारी काजीकुमार आचार्यले दिएको जानकारी अनुसार, कार्की विरुद्ध ठगी सम्बन्धी उजुरी परेपछि अनुसन्धान थालिएको थियो। प्रारम्भिक अनुसन्धानमा कार्कीले झुटो प्रलोभन देखाई रकम लिएको प्रमाण भेटिएको जनाइएको छ।
निजलाई थप अनुसन्धान तथा कारबाहीको लागि वैदेशिक रोजगार विभाग, ताहाचलमा बुझाइएको छ।
