काठमाडौँ । गुल्मीको राक्से क्षेत्रमा गएको पहिरोका कारण कालीगण्डकी करिडोर पूर्ण रूपमा अवरुद्ध भएको छ। लगातारको वर्षापछि खसेको ठूलो पहिरोले सडक बिचैमा थुनिँदा सवारी आवागमन ठप्प भएको हो।
.gif)
जिल्ला प्रहरी कार्यालय गुल्मीका सूचना अधिकारी गङ्गाबहादुर सारुले दिएको जानकारी अनुसार, बाटो खुलाउन तत्कालै पुर्तिघाटस्थित प्रहरी चौकीबाट प्रहरी टोली खटाइएको छ। पहिरो पन्छाउन डोजर लगायतका उपकरण परिचालन गरिएको छ।
सडक अवरुद्ध हुँदा पर्वत, बागलुङ, रिडी हुँदै पाल्पा तथा बुटवल जान लागेका यात्रुहरू बीच बाटोमै रोकिएका छन्। पहिरोको मात्रा धेरै भएकाले सडक खुलाउन केही समय लाग्न सक्ने अनुमान गरिएको छ।
स्थानीय प्रशासनले यात्रुहरूलाई सुरक्षित स्थानमा बस्न अनुरोध गरेको छ भने पहिरोको जोखिम रहेका क्षेत्रहरूमा सर्तकता अपनाउन आग्रह गरेको छ।
