गोरखा, साउन २४–उत्तरी गोरखा क्षेत्रमा वन्यजन्तु चोरी–सिकार, अवैध वन फडानी र काठ तस्करी जस्ता गैरकानूनी क्रियाकलाप बढ्न थालेको सूचनाका आधारमा जिल्ला वन कार्यालय गोरखाको नेतृत्वमा संयुक्त वन गस्ती सुरु गरिएको छ।
.gif)
गस्तीमा नेपाली सेनाको आइसोलेसन कम्पनी, नेपाल प्रहरी, सशस्त्र प्रहरी बल र स्थानीय वन उपभोक्ता समूहका प्रतिनिधिहरूको सहभागिता रहेको छ। गस्तीको उद्देश्य सीमावर्ती क्षेत्रमा बढ्दो तस्करी नियन्त्रण गर्नुका साथै वन क्षेत्रको संरक्षणमा स्थानीय सहभागिता बढाउनु रहेको वन अधिकृत रमेश केसीले जानकारी दिए।
“गस्ती नियमित रूपमा सञ्चालन हुनेछ, र आवश्यक परे विशेष निगरानी पनि गरिनेछ,” अधिकृत केसीले भने।
स्थानीय बासिन्दाले संयुक्त गस्ती प्रति समर्थन जनाउँदै वन स्रोतको दीर्घकालीन संरक्षणका लागि सबैले सहयोग गर्नुपर्ने बताएका छन्। गस्तीका क्रममा हालसम्म केही शंकास्पद गतिविधिको निगरानी गरिएको भए पनि ठूला प्रकृतिका घटना भने फेला परेका छैनन्।
गोरखाको उत्तरी क्षेत्र, जसले तिब्बत (चीन) सँग सिमाना जोड्छ, संवेदनशील मानिने क्षेत्र मध्ये पर्दछ। यस क्षेत्रमा समय–समयमा वनजन्य तस्करी र वन्यजन्तु सिकारका घटनाहरू हुने गरेका छन्।
जिल्ला वन कार्यालयले आवश्यक परे अझ कडा कदम चाल्ने जनाएको छ।
