काठमाडौं। नबिल बैंकले वातावरणीय संरक्षण र स्थायित्वलाई केन्द्रमा राखी विभिन्न नयाँ बैंकिङ सेवा तथा उत्पादन सार्वजनिक गरेको छ । बैंकका अनुसार यी सेवा तथा योजनाहरूले कार्बन उत्सर्जन नियन्त्रण, नवीकरणीय ऊर्जाको प्रवर्द्धन तथा हरित वित्त प्रणालीमा उल्लेखनीय योगदान पुर्‍याउने लक्ष्य लिएको छ ।बैंकले ल्याएको ‘नाबिल डिजिओ बचत खाता’ मा न्यूनतम शेषराशि १० हजार रुपैयाँ राख्नुपर्नेछ । यस खाता नेपाली नागरिक, विदेशमा बसोबास गर्ने नेपाली (एनआरएन) र गैर–नाफामूलक संस्थाहरूले खोल्न सक्ने बैंकले जनाएको छ । 

अर्धवार्षिक न्यूनतम औसत ५० हजार रुपैयाँ पुगेका खातावालाको नाममा रूख रोप्ने व्यवस्था गरिने बैंकले जनाएको छ । साथै जम्मा रकमको एक निश्चित प्रतिशत वातावरणीय संरक्षणका लागि स्थायी पहलहरूमा खर्च गरिने बैंकको दाबि छ ।खाताका ग्राहकलाई पहिलो वर्ष भिसा डेबिट तथा क्रेडिट कार्ड सदस्यता शुल्क, मोबाइल र इन्टरनेट बैंकिङ निःशुल्क तथा लकर सुविधामा २५ प्रतिशत सम्मको छुट दिइने बैंकले जनाएको छ ।बैंकले स्थायित्वका मापदण्ड समेटिएको ‘नाबिल स्थायी आवास ऋण’ पनि ल्याएको छ । बेस रेट प्लस १ प्रतिशत देखि २.७५ प्रतिशत सम्मको ब्याज दरमा उपलब्ध उक्त योजना अन्तरगत हुने छ । 

उक्त योजनाको ऋणको अवधि २० वर्षसम्म हुने बैंकले जनाएको छ । ऋणको न्यूनतम उमेर १८ वर्ष र अधिकतम ७० वर्ष तोकिएको छ । वर्षा जल संचय, सौर्य ऊर्जा, अपशिष्ट व्यवस्थापन, हरियाली बगैंचा लगायतका कम्तीमा तीन मापदण्ड पूरा गरेको स्वघोषणा गर्नुपर्ने बैंकले जनाएको छ । ऋणको भुक्तानी इएमआई प्रणालीबाट गर्न सकिनेछ भने निर्माण अवधिका लागि १२ महिनासम्म मोरेटोरियम सुविधा पनि उपलब्ध गराउने बैंकले जनाएको छ । पहिलो वर्ष ग्राहकलाई २ लाख रुपैयाँ सम्मको निःशुल्क क्रेडिट कार्ड सेवा प्रदान गरिने बैंकले जनाएको छ ।

इलेक्ट्रिक सवारीप्रति प्रोत्साहन दिने उद्देश्यले बैंकले अटो लोनमा विशेष योजना समेत बैंकले ल्याएको छ । पेट्रोल वा डिजेल सवारीका लागि बेस रेटमा प्लस २ प्रतिशत देखि ४ प्रतिशत सम्मको कर्जा र इलेक्ट्रिक सवारीका लागि १ प्रतिशत देखि ३ प्रतिशत सम्म ब्याज दर तोकिएको बैंकले जानकारी दिएको छ डाक्टर, इन्जिनियर, वकिल, बैंककर्मी, आईटी पेशेवर र चार्टर्ड एकाउन्टेन्टहरूका लागि लक्षित गर्दै ‘नाबिल प्रोफेसनल इ–अटो लोन’ समे बैंकले सार्वजनिक गरिएको छ । यो योजना अन्तर्गत ८ वर्षसम्मको अवधि, ८.२५ प्रतिशत निश्चित ब्याजदर र ६० प्रतिशत सम्मको वित्तीय सुविधा उपलब्ध हुने बैंकले बताएको छ ।कृषि क्षेत्रमा लगानी बढाउन बैंकले ‘कमर्सियल एग्रो एण्ड लाइभस्टक लोन’ योजना ल्याएको छ । यसअन्तर्गत १० लाख रुपैयाँदेखि १ करोड रुपैयाँसम्मको ऋण, बेस रेट प्लस २ प्रतिशत ब्याजदरमा दिने बैंकले जनाएको छ । 

उक्त कर्जाको भुक्तानी क्यासफ्लोअनुसार मासिक, त्रैमासिक वा अर्धवार्षिक रूपमा गर्न सकिने बैंकको भनाई छ । ‘कमर्सियल एग्रीकल्चर लोन’ साना किसान तथा कृषि उद्यमीहरूका लागि लक्षित गरिएको छ । जसमा १५ लाख रुपैयाँसम्मको ऋण उपलब्ध हुनेछ । ‘एग्री बिजनेस लोन’ अन्तर्गत ८ वर्षसम्मको अवधिमा २० लाख रुपैयाँसम्म ऋण दिने बैंकको भनाई छ । महिला उद्यमशिता प्रवर्द्धनका लागि बैंकले ‘नाबिल नारी ऋण’ योजना ल्याएको छ । यस योजना अन्तर्गत ५ करोड रुपैयाँसम्म ऋण सुविधा र २० हजार रुपैयाँसम्म निःशुल्क क्रेडिट कार्ड सेवा दिइने बैंकले जनाएको छ । महिला उद्यमी ऋण अन्तर्गत महिलाको ५० प्रतिशत स्वामित्व भएको व्यवसायका लागि २० लाख रुपैयाँसम्म ‘महिला सञ्चालित माइक्रोएन्टरप्राइज ऋण’ अन्तर्गत ब्याज अनुदानसहित १५ लाख रुपैयाँसम्म ऋण उपलब्ध गराउने बैंकले जनाएको छ । 

साना व्यवसाय उत्थानका लागि ‘नबिल सक्षम ऋण’ अन्तर्गत १ करोडसम्मको ऋण १०–१२ वर्षसम्मको अवधि सहित उपलब्ध गराउने बैंकले जनाएको छ । वैदेशिक रोजगारीबाट फर्किएका दक्ष श्रमिकहरूका लागि ‘नबिल स्किल्ड माइग्रेन्ट उद्यमी ऋण’ अन्तर्गत १.५ करोडसम्मको सुविधा रहेको छ भने माइक्रो उद्यमहरूका लागि १५ लाखसम्म ऋण दिने बैंकले जनाएको छ । सौर्य ऊर्जा, पर्यटन तथा हस्तकलाका क्षेत्रमा पनि बैंकले स्थायी ऋण उत्पादन उपलब्ध गराउने जनाएको छ । यी क्षेत्रमार्फत नवीकरणीय ऊर्जाको प्रवर्द्धन, वातावरणमैत्री पर्यटनको विकास तथा स्थानीय हस्तकला संरक्षणलाई बैंकले प्रोत्साहन दिने बैंकको भनाई छ ।

बैंकले ल्याएका यी सम्पूर्ण स्थायित्व केन्द्रित उत्पादनहरूले वातावरण संरक्षणसँगै आर्थिक समावेशिता र दिगो विकासमा सहयोग पुग्ने विश्वास लिएको बैंकले बताएको छ । बैंकको यी प्रयासहरू नेपाली हरित अर्थतन्त्रको प्रवर्द्धनमा नयाँ युगको सुरुवात हुने अपेक्षा गरिएको बैंकको भनाई छ ।