काठमाडौं । काठमाडौं उपत्यकामा ट्राफिक नियम उल्लंघन गर्ने ६१२ सवारीसाधनमाथि कारबाही गरिएको छ। काठमाडौं उपत्यका ट्राफिक प्रहरी कार्यालयले सार्वजनिक गरेको दैनिक विवरणअनुसार विभिन्न कसुरमा २४ घण्टाभित्र उक्त संख्यामा सवारीसाधनमाथि कारबाही गरिएको हो।
.gif)
कार्यालयको विवरणअनुसार मापसे गरी सवारी चलाउने ५३ जना, सिटबेल्ट प्रयोग नगर्ने ३२ जना, ट्राफिक बत्ती उल्लंघन गर्ने १८ जना र तीव्र गतिमा सवारी चलाउने ३५ जनामाथि कारबाही गरिएको छ।
त्यस्तै, हर्न निषेधको नियम उल्लंघन गर्ने सात जना, लेन अनुशासन पालना नगर्ने पाँच जना र एकतर्फी सडकमा नियमविपरीत सवारी चलाउने पाँच जनामाथि पनि कारबाही गरिएको छ। अन्य कसुरमा ४५० जना तथा अवस्था ठीक नभएको सवारीसाधन चलाउने १७ जनामाथि कारबाही गरिएको विवरणमा उल्लेख छ।
काठमाडौं उपत्यका ट्राफिक प्रहरी कार्यालयका अनुसार ट्राफिक नियमको पालना गराउनु, सडक दुर्घटना न्यूनीकरण गर्नु तथा सवारी आवागमनलाई व्यवस्थित बनाउनु ट्राफिक कारबाहीको उद्देश्य हो।
ट्राफिक प्रहरीले चालकलाई मादक पदार्थ सेवन गरी सवारी नचलाउन, तीव्र गतिमा सवारी नचलाउन, ट्राफिक संकेत तथा लेन अनुशासन पालना गर्न र सवारी चलाउँदा आवश्यक सुरक्षा सावधानी अपनाउन आग्रह गर्दै आएको छ।
ट्राफिक नियमको पालना गर्नु चालकको दायित्व भएकाले सुरक्षित यात्राका लागि सबै सवारी चालक तथा सडक प्रयोगकर्ताले नियम पालना गर्न आवश्यक छ।
