वासिङ्टन डीसी । अमेरिकाले वासिङ्टनका लागि ब्राजिलकी राजदूत मारिया लुइजा रिबेइरो भियोटीको भिसा रद्द गरेको छ । यो कदमलाई ब्राजिलको आगामी निर्वाचनअघि दुवै देशबिच बढ्दो कूटनीतिक तनावको पछिल्लो घटनाका रूपमा हेरिएको छ ।अमेरिकी विदेश मन्त्रालयका एक अधिकारीका अनुसार यो निर्णय ब्राजिलले गत महिना अमेरिकी विदेश मन्त्रालयका दुई अधिकारीलाई प्रवेश भिसा दिन अस्वीकार गरेपछि पारस्परिक कदमका रूपमा चालिएको हो । भिसा रद्द गरिए पनि भियोटीलाई अमेरिकाबाट निष्कासन गरिएको छैन ।
.gif)
ब्राजिल सरकारसँग धेरै सातासम्म लगातार संवाद गरिएको भए पनि आवश्यक सहयोग नपाएको दाबी अमेरिकी विदेश मन्त्रालयका प्रवक्ताले गरेका छन् । साथै, आवश्यक परे थप कूटनीतिक कदम चाल्न सकिने चेतावनी पनि दिएका छन् । उता, ब्राजिलका राष्ट्रपति लुइज इनासियो लुला दा सिल्भाले अमेरिकी अधिकारीहरूले ब्राजिलको निर्वाचन प्रक्रियामा हस्तक्षेप गर्न खोजेको आरोप लगाएका छन् । अमेरिकाले भने यो आरोपलाई आधारहीन भन्दै अस्वीकार गरेको छ ।ब्राजिल सरकारले भिसा अस्वीकार गरेका दुई अमेरिकी अधिकारीहरू अभिव्यक्ति स्वतन्त्रता, धार्मिक स्वतन्त्रता र निर्वाचनको निष्पक्षतासम्बन्धी विषयमा छलफल गर्न ब्राजिल जान लागेका थिए । उनीहरूले पूर्वराष्ट्रपति जाइर बोल्सोनारोका छोरा तथा दक्षिणपन्थी नेता फ्लाभियो बोल्सोनारोसँग पनि भेट गर्ने कार्यक्रम रहेको बताइएको थियो ।
फ्लाभियो बोल्सोनारोले केही समयअघि ब्राजिलको विद्युतीय मतदान प्रणालीबारे प्रश्न उठाएका थिए । तर, ब्राजिलको सर्वोच्च निर्वाचन अदालतले उनका दाबीहरू अस्वीकार गर्दै देशको विद्युतीय मतदान प्रणाली विश्वकै सुरक्षित प्रणालीहरूमध्ये एक भएको जनाएको छ ।अमेरिकी प्रतिनिधिमण्डलले निर्वाचनबारे आधारहीन शङ्का उत्पन्न गर्न सक्ने भन्दै उनीहरूको भिसा रोकिएको ब्राजिल सरकारले स्पष्ट पारेको छ । राष्ट्रपति कार्यालयले यसलाई ब्राजिलको आन्तरिक राजनीतिक प्रक्रियामा हस्तक्षेप गर्ने अस्वीकार्य प्रयास भनेको छ ।यसैबिच, ब्राजिल सरकारले अमेरिकी राष्ट्रपति डोनाल्ड ट्रम्पले ब्राजिलका लागि प्रस्ताव गरेका नयाँ अमेरिकी राजदूत ड्यानियल पेरेजको नियुक्ति पनि अझै स्वीकृत गरेको छैन । उक्त प्रस्ताव अन्तर्राष्ट्रिय कानुनअनुसार समीक्षा भइरहेको ब्राजिल सरकारले जनाएको छ ।
