काठमाडौँ । अष्ट्रेलियाले कीराको संक्रमण भेटिएपछि नेपालबाट निर्यात हुने केही खाद्य पदार्थको आयातमा अस्थायी प्रतिबन्ध लगाएको छ।
.gif)
ढुवानी गरिएका सामग्रीमा कीरा फेला परेपछि गुन्द्रुक, कोदो, भटमास, मकै र फापर लगायत बिरुवामा आधारित उत्पादनहरूको आयात निलम्बन गरिएको बताइएको छ। कृषि मन्त्रालय अन्तर्गतको प्लान्ट क्वारेन्टाइन कार्यालयले उद्धृत गरेको आधिकारिक स्रोतअनुसार प्रभावित उत्पादनहरू पुष्टि भएका हुन्।
कृषि मन्त्रालयका प्रवक्ता रोशन अधिकारीले अष्ट्रेलियाले लागू गरेको आयात निलम्बन हाल कार्यान्वयनमा रहेको पुष्टि गरेका छन्।
यस निर्णयले अष्ट्रेलियामा बसोबास गर्ने नेपाली समुदाय तथा नेपाली परम्परागत खाद्य वस्तु निर्यात गर्ने व्यवसायमा प्रत्यक्ष असर पर्ने अनुमान गरिएको छ।
नेपालको पहिलो खाद्य शब्दकोश “फलाङ खाद्य शब्दकोश” का संकलनकर्ता शिव न्यौपाने ले अन्तर्राष्ट्रिय मापदण्ड पालना नगरी खाद्य सामग्री निर्यात गर्दा नेपालकै प्रतिष्ठामा असर पर्ने बताएका छन्।
उनले विशेषगरी अष्ट्रेलिया जस्ता देशहरूमा खाद्य उत्पादन निर्यात गर्दा गुणस्तर, सरसफाइ तथा क्वारेन्टाइन मापदण्ड कडाइका साथ पालना गर्न सम्बन्धित निकायलाई आग्रह गरेका छन्।
न्यौपानेका अनुसार यस्तो अवस्थाले नेपाली व्यवसायलाई आर्थिक नोक्सानी मात्र नभई नेपाली उत्पादनप्रतिको विश्वसनीयता र अन्तर्राष्ट्रिय प्रतिष्ठामा समेत असर पुग्न सक्ने चिन्ता बढाएको छ।
