जकार्ता । इन्डोनेशियाको मुद्रा रुपयाको भाउ घटेर अहिलेसम्मकै न्यून स्तरमा ओर्लिएको छ । बिहीबार एक डलरको भाउ इन्डोनेशियामा १७ हजार ३१५ रुपयामा पुगेको छ । यो अहिलेसम्मकै सबैभन्दा कमजोर स्थिति हो । इरान युद्धका कारण स्टेट अफ होर्मुज ठप्पप्रायः भएपछि विश्वभर तेलको आपूर्ति प्रभावित भएर कच्चा तेलको भाउ बढेको छ ।इरानमा अमेरिकी युद्धविरामले पनि स्थिति साम्य पार्न सकेको छैन । अमेरिकाले इरानमाथि आक्रमण रोकेको भएपनि इरानले स्टेट अफ होर्मुजमा जहाजामथि आक्रमण गरेपछि विश्व बजारमा बिहीबार कच्चा तेलको भाउ उकालो लागेको छ ।
.gif)
तेल महँगो भएसँगै तेल आयातमा निर्भर इन्डोनेशिया, भारत, फिलिपिन्स र थाइल्यान्ड जस्ता देश मारमा परेका छन् । आयात खर्च बढ्दा यी देशका मुद्रा दबाबमा परेका छन् । बैंक अफ इन्डोनेशियाले बुधबार रुपैयाको अवमूल्यन रोक्न सबै काम गर्ने भनेको छ । मुद्रास्फीति नियन्त्रण गर्न नीतिगत समायोजन गर्न तयार रहेको पनि बताइएको छ ।इरान युद्ध सुरु भएदेखि रुपया ३ प्रतिशतभन्दा बढीले कमजोर भइसकेको छ । योसँगै इन्डोनेशियाली रुपया यस वर्षको दोस्रो सबैभन्दा कमजोर एसियाली मुद्रा बनेको छ । पहिलो स्थानमा भारतीय रुपैयाँ रहेको छ । अन्य देशहरूमा पनि समान प्रवृत्ति देखिएको छ । फिलिपिन्सको पेसो दुई सातामा पहिलो पटक कमजोर हुँदै बिहीबार प्रति डलर ६० दशमलव ५२४ मा झरेको छ भने थाई भाट अप्रिल ८ यताकै न्यून स्तरमा ओर्लिएको छ ।
