पर्सा- चालु आर्थिक वर्षको पहिलो छ महिनामा वीरगञ्ज भन्सार नाका हुँदै दुईपाङ्ग्रे सवारीसाधनको आयात उल्लेखनीय रूपमा बढेको छ। यस अवधिमा रु चार अर्ब ५६ करोड बराबरका ३२ हजार ३३१ वटा अनएसेम्बल्ड मोटरसाइकल आयात हुँदा राज्यकोषमा रु चार अर्ब ४३ करोड राजस्व संकलन भएको छ।
.gif)
वीरगञ्ज भन्सार कार्यालयका अनुसार गत आर्थिक वर्षको सोही अवधिमा रु तीन अर्ब ३८ करोड बराबरका २५ हजार ८५७ वटा अनएसेम्बल्ड मोटरसाइकल मात्र आयात भएका थिए। यसपटक संख्या र मूल्य दुवैमा उल्लेख्य वृद्धि देखिएको हो।
त्यस्तै, चालु आवको पहिलो छ महिनामा रु ४५ करोड ८१ लाख बराबरका चार हजार ५६७ वटा मोटरसाइकल आयात भएका छन्। अघिल्लो आवको सोही अवधिमा भने रु २० करोड ७६ लाख बराबरका दुई हजार १९२ वटा मोटरसाइकल आयात भएको थियो।यसैबीच, विद्युतीय मोटरसाइकलप्रति उपभोक्ताको आकर्षण तीव्र बन्दै गएको देखिएको छ।
चालु आवको पहिलो छ महिनामा रु ५८ करोड १८ लाख बराबरका चार हजार ५९४ वटा विद्युतीय मोटरसाइकल आयात भएका छन्, जबकि गत आवको सोही अवधिमा रु ३० करोड ९६ लाख बराबरका दुई हजार २१८ वटा मात्रै आयात भएका थिए।भन्सार स्रोतका अनुसार पेट्रोलियम पदार्थको मूल्य, वातावरणमैत्री सवारीप्रतिको चासो र सहरी क्षेत्रमा बढ्दो प्रयोगले दुईपाङ्ग्रे, विशेषतः विद्युतीय मोटरसाइकलको आयात बढाएको हो।
