गुलरिया(बर्दिया) माघ २१ गते । बर्दियामा यस वर्ष ३७ करोड बराबरको केरा बिक्री भएको छ ।बर्दिया जिल्लाका छ सय किसानहरूले ७५० हेक्टर क्षेत्रफलमा करिब ३८ हजार मेट्रिक टन केरा उत्पादन गरेका छन् । बर्दियामा एक हेक्टरमा करिब ५० मेट्रिक टन केरा उत्पादन हुँदै आएको केरा व्यवसाय सङ्घ बर्दियाका अध्यक्ष टोपलाल विकले बताउनुभयो । यस वर्षको केराको सिजनमा किसानहरूले ३७ करोडको केरा बिक्री गर्न सफल भएको उहाँले बताउनुभयो । सुरुको समयमा केरा नबिके पनि सरकारले भारतबाट केरा आयात पूर्णरूपमा रोकेपछि केराको बिक्री बढेको थियो । 

दसैँसम्म नबिकेको केरा सरकारले भारतीय केरा रोग लागेको भेटाएपछि केरा आयातमा रोक लगाएको थियो । त्यसपछि बर्दियामा उत्पादन भएका केरा धमाधम बिक्री भएका थिए ।दसैँ अगाडिसम्म काँचो केरा तीन सय रुपियाँ प्रति क्रेट बिक्री गर्न बाध्य किसानले केरा आयात बन्द भएपछि पाँच सय रुपियाँसम्म मूल्य पाएका थिए ।  यस वर्ष गत वर्षको तुलनामा केरा किसानको आम्दानी केही घटेको छ । सुरुमा केरा बिक्री नभएको र पछि बर्सातको कारणले बिक्री गर्न तयार भएका केरामा ढुसी लागेपछि उत्पादनमा कमी आएको थियो । बर्दिया जिल्लामा केरा जोन कार्यक्रम लागु भएपछि करिब ७५० हेक्टर क्षेत्रफलमा केरा खेती हुँदै आएको छ ।गत वर्ष बर्दियामा वार्षिक ४० करोड बराबरको केराको कारोबार भएको थियो । केरा खेती गर्ने किसानले विगत १४ वर्षदेखि सरकार समक्ष भारतीय केराको आयात बन्द गर्नुपर्ने माग राख्दै आएका थिए । 

यस वर्ष पनि किसान कृषि मन्त्रालय मै पुगेर केराको आयात रोक्नुपर्ने माग गरेका थिए । सोही समय भारतमा केरामा लाग्ने टि आर फोर नामक रोगको प्रकोप फैलिएपछि केरा आयात पूर्णरूपमा बन्द भएको अध्यक्ष विकले बताउनुभयो । भारतबाट आयात बन्द भएपछि बर्दियामा केरा खेती थप विस्तार हुने सम्भावना बढेको छ । केरा किसान टीकाकुमारी सम्सेली मगरले नेपाली केराले नै बजारको माग धान्ने बनाउनका लागि थप खेती विस्तार तर्फ लागेको बताउनु भयो । उहाँले भन्नुभयो,“अब केराको बजार मूल्यको चिन्ता भएन अरु किसानलाई पनि केरा खेती गर्न प्रेरित गरिरहेका छौँ । किसानलाई सङ्गठित बनाएर सामूहिक रूपमा केरा खेती गर्ने सोच बनाएका छौँ ।”किसानले यस वर्ष केरा खेती थप गर्न थालेको केरा किसान तथा व्यवसायी शम्भुप्रसाद अधिकारीले बताउनुभयो । उहाँले भन्नुभयो,“किसान केरा खेती तर्फ थप आर्कषित भएका छन् । अब केरा खेतीको क्षेत्रफल बढ्ने सम्भावना रहेको छ ।”बर्दियामा केरा खेती विस्तार सँगै व्यवस्थित हुँदै गएको छ । केरा पकाउने र स्टोर गर्न मिल्ने च्याम्बर, टिस्युकल्चर केरा नर्सरी, केराको थामबाट रेसा निकाल्ने उद्योग स्थापना भएका छन् ।