काठमाडौँ । ह्वाट्सएपले आफ्ना एन्ड्रोइड र आईफोन प्रयोगकर्ताहरूका लागि धेरै नयाँ र उपयोगी फिचरहरू सार्वजनिक गरेको छ। यी अपडेटहरू विशेषगरी कल, च्याट, स्ट्याटस र डेस्कटपको प्रयोगलाई अझ सहज बनाउन ल्याइएका हुन्।छुट्टीको मौसम सुरु हुनुअघि आएका यी परिवर्तनहरूले प्रयोगकर्ताहरूलाई अझ सरल र स्मार्ट अनुभव प्रदान गर्नेछ।
.gif)
कलिङमा परिवर्तनहरू
सबैभन्दा पहिले कलिङ फिचरको कुरा गर्दा, अब तपाईंले कसैलाई कल गर्दा उसले उठाउन सकेन भने, तपाईं तुरुन्तै भ्वाइस वा भिडियो सन्देश रेकर्ड गरेर पठाउन सक्नुहुन्छ। यसको मतलब, अब छुट्टै भ्वाइसमेलको आवश्यकता पर्ने छैन। कल रिसिभ गर्न नसक्ने व्यक्तिले पछि फुर्सदमा आरामसँग तपाईंको सन्देश सुन्न वा हेर्न सक्नेछन्।
भ्वाइस च्याटिङ हुनेछ रमाइलो
यसबाहेक, ह्वाट्सएपले भ्वाइस च्याटमा रियाक्सन फिचर जोडेको छ। अब ग्रुप भ्वाइस च्याटको क्रममा नबोलिकनै इमोजीको माध्यमबाट आफ्नो प्रतिक्रिया दिन सकिन्छ। यसले कुराकानीमा अवरोध आउने छैन र कुराकानी अझ रमाइलो हुनेछ । ग्रुप भिडियो कलमा अब ‘स्पिकर स्पटलाइट’ फिचर पनि उपलब्ध हुनेछ, जसले बोलिरहेको व्यक्तिलाई स्क्रिनमा अझ स्पष्ट रूपमा देखाउनेछ।
फोटो बनाउन सजिलो
च्याट र डेस्कटप प्रयोगकर्ताहरूका लागि पनि राम्रा परिवर्तनहरू गरिएका छन्। ह्वाट्सएपमा मेटा एआईको मद्दतले अब उत्कृष्ट गुणस्तरका इमेजहरू बनाउन सकिन्छ। यति मात्र होइन, अब कुनै पनि फोटोलाई एआईको सहयोगमा सानो एनिमेटेड भिडियोमा बदल्न सकिन्छ, जसलाई च्याट वा स्ट्याटसमा सेयर गर्न सकिन्छ।
डेस्कटप संस्करणमा पनि नयाँ फिचर
डेस्कटप प्रयोगकर्ताहरूका लागि नयाँ मिडिया ट्याब थपिएको छ। यसले गर्दा अब सबै च्याटमा रहेका फोटो, भिडियो, डकुमेन्ट र लिङ्कहरू एउटै ठाउँमा सजिलै खोज्न सकिन्छ। साथै, लामो लिङ्कहरू अब अझ स्पष्ट र छोटो ढाँचामा देखिनेछन्, जसले च्याटलाई कम भद्रगोल देखाउनेछ।
स्ट्याटसमा स्टिकरहरू
ह्वाट्सएप स्ट्याटसमा पनि नयाँ इन्टर्याक्टिभ स्टिकरहरू आएका छन्। अब तपाईंले गीतका बोल जोड्न सक्नुहुन्छ, प्रश्नहरू सोध्न सक्नुहुन्छ र मानिसहरूले ट्याप गरेर प्रतिक्रिया दिन सक्ने खालका स्टिकरहरू राख्न सक्नुहुन्छ। यता, च्यानलहरूमा पनि अब प्रश्न सोध्ने फिचर उपलब्ध हुनेछ, जसले च्यानल एडमिन र फलोअर्सहरूबीचको अन्तरक्रिया बढाउनेछ। समग्रमा, ह्वाट्सएपका यी नयाँ फिचरहरू कुराकानीलाई अझ सरल, छिटो र रमाइलो बनाउनका लागि ल्याइएका हुन्। एन्ड्रोइड र आईफोन दुवै प्रयोगकर्ताले यी अपडेटहरूको फाइदा लिन सक्नेछन्।
