काठमाडौंः संघीय सडक सुपरिवेक्षण तथा अनुगमन कार्यालयले वर्षायामलाई मध्यनजर गर्दै तीन महिनाका लागि सडक खन्न पूर्ण रूपमा प्रतिबन्ध लगाएको छ ।
.gif)
कार्यालयले एक सार्वजनिक सूचना जारी गर्दै असार ३ गतेदेखि भदौ मसान्तसम्म सडक खन्न रोक लगाएको हो ।
वर्षाको समयमा धारा, ढल, बिजुली, टेलिफोन जस्ता प्रयोजनका लागि सडक खन्दा तत्काल मर्मत गर्न नसकिने र यसले सडकलाई थप जीर्ण बनाउने भएकाले यस्तो निर्णय लिइएको कार्यालयले जनाएको छ । खनिएका सडकका कारण सवारी आवागमनमा बाधा पुग्ने र दुर्घटनाको जोखिम समेत बढ्ने हुँदा प्रतिबन्ध लगाउनु परेको हो ।
कार्यालयले आफ्ना मातहतका १० वटै सडक डिभिजनलाई परिपत्र गरी कुनै पनि निकायलाई सडक खन्ने स्वीकृति नदिन निर्देशन दिएको छ ।
सूचनाको अवज्ञा गरी कसैले सडक खनेको वा भत्काएको पाइएमा ‘सार्वजनिक सडक ऐन, २०३१’ अनुसार कडा कारबाही गरिने चेतावनीसमेत कार्यालयले दिएको छ । यो नियम लागू भए सँगै अब विकास निर्माणका नाममा जथाभावी सडक खन्ने कार्य पूर्ण रूपमा बन्द हुनेछ ।
