काठमाडौं । गरिमा चौधरीमाथि भएको जघन्य अपराधपछि सरकार र पीडित परिवारबीच तीनबुँदे सहमति भएको छ। सहमतिमा विद्यमान कानुन पुनरावलोकन गरी सात दिनभित्र सुझावसहितको प्रतिवेदन पेस गर्ने, गरिमाको सालिक निर्माणका लागि पहल गर्ने तथा परिवारको रीतिरिवाजअनुसार अन्त्येष्टिको व्यवस्था गर्ने विषय समेटिएका छन्।
.gif)
तर, सहमति हुँदैमा प्रश्न सकिँदैन। गरिमाको सालिक निर्माण उनको सम्झना र सम्मानका लागि हुन सक्छ, परिवारले आफ्नो संस्कारअनुसार अन्त्येष्टि गर्नु उनीहरूको अधिकार हो। तर न्यायको प्रश्न यतिमै सीमित हुँदैन।
आज सडकमा उठेको आवाज केवल एउटा परिवारको पीडाका लागि होइन। जघन्य अपराधका घटनामा कडा कानुनी व्यवस्था होस्, अपराधीले उन्मुक्ति नपाओस् र भोलिका दिनमा कुनै पनि छोरीले डर र असुरक्षामा बाँच्न नपरोस् भन्ने मागसहित यो आवाज उठेको हो।
गरिमाको न्यायका लागि सडकमा उत्रिएका आम नागरिकसँगै काखमा साना बालबालिका बोकेर, घाम–पानी नभनी आवाज उठाउन पुगेका सुत्केरी आमाहरूको संघर्ष पनि कुनै सामान्य सहमतिको कागजमा टुंगिन सक्दैन। उनीहरूले केवल आश्वासनका लागि सडक रोजेका होइनन्; भोलिका दिनमा आफ्ना छोरीचेली सुरक्षित रहून् भन्ने सुनिश्चितताका लागि आवाज उठाएका हुन्।
त्यसैले अब सरकारसँग प्रश्न स्पष्ट छ—सात दिनभित्र प्रतिवेदन आएपछि के हुन्छ? कुन कानुन संशोधन गरिन्छ? संशोधनको प्रक्रिया कहिलेसम्म अघि बढ्छ? संसद्मा विधेयक कहिले पुग्छ? पारित भएपछि कार्यान्वयन कहिलेदेखि हुन्छ?
सरकारले दिएको प्रतिबद्धता अब समयसीमासहितको कानुनी कार्ययोजनामा परिणत हुनुपर्छ। अपराधको प्रकृति हेरेर सजायको व्यवस्था कडा बनाउनेदेखि अनुसन्धान, अभियोजन र न्यायिक प्रक्रियालाई प्रभावकारी बनाउने विषयमा ठोस सुधार आवश्यक छ।
सालिक बनाएर मात्र गरिमाप्रतिको न्याय पूरा हुँदैन। राहत दिएर मात्र पीडित परिवारको पीडा सम्बोधन हुँदैन। कानुन बलियो बनाएर, त्यसलाई प्रभावकारी रूपमा कार्यान्वयन गरेर मात्रै भविष्यका गरिमाहरूलाई सुरक्षित बनाउन सकिन्छ।
यो आन्दोलन केवल गरिमाका लागि होइन—हिजो अन्यायमा परेका नाबालिकाका लागि हो, आज न्याय खोजिरहेका परिवारका लागि हो र भोलि जन्मिने हाम्रा छोरीचेलीले भयमा होइन, सुरक्षित वातावरणमा बाँच्न पाऊन् भन्ने सुनिश्चितताका लागि हो।
अब सरकारसँग आश्वासन होइन, कानुनी प्रतिबद्धता चाहिएको छ।सहमति मात्रै होइन, कार्यान्वयन चाहिएको छ।
सालिक मात्रै होइन, सुरक्षित भविष्य चाहिएको छ।र सबैभन्दा महत्वपूर्ण—न्याय चाहिएको छ।
