काठमाडौँ। वरिष्ठ कलाकार मदनकृष्ण श्रेष्ठको जीवनीमा आधारित फिल्म ‘म मदनकृष्ण’मा वर्षा राउत भित्रिएकी छन् । निर्माण टिमका अनुसार उनी हरिवंश आचार्यको श्रीमतीको भूमिकामा देखिनेछिन् । फिल्ममा हरिवंशको भूमिकामा अरुण क्षेत्री छानिएका छन् । वर्षा र अरुणले पहिलो पटक एकसाथ अभिनय गर्न लागेका हुन् ।मदनकृष्णको जिन्दगीका सुख, दुःख समेट्दै उनको सम्पूर्ण जीवन सङ्घर्ष र आरोह–अवरोहलाई समेटेर निर्माण हुने बायोपिक ‘म मदनकृष्ण’लाई मिलन चाम्सले निर्देशन गर्नेछन् । उनले गत वर्ष राष्ट्रिय फुटबल टिमकी गोलरक्षक तथा क्याप्टेन अन्जिला तुम्बाप्पेको बायोपिक फिल्म ‘अञ्जिला’ निर्माण गरेका थिए ।
.gif)
फिल्ममा मदनकृष्णको भूमिका अभिनेता महेश त्रिपाठी र उनकी पत्नीको भूमिकामा केकी अधिकारीलाई देख्न सकिन्छ ।मदनकृष्णको बाल्यकाल, सरकारी जागिरे जीवन, हरिवंशसँगको सहकार्य, अन्तरजातीय विवाहलगायतको कथा बायोपिकमा समावेश हुनेछ । फिल्ममा राजाराम पौडेल, किरण केसी, रुषा न्यौपाने, यमन श्रेष्ठ, देशभक्त खनाल लगायतको अभिनय रहनेछ । भिन्टेज मोसन पिक्चर्सको प्रस्तुति बायोपिक फिल्मलाई राजकुमार श्रेष्ठले निर्माण गर्नेछन् ।
