धरान (सुनसरी), ५ वैशाख । १६औँ संस्करणको अन्तरराष्ट्रिय आमन्त्रण रेडबुल इटहरी गोल्डकप फुटबल प्रतियोगितामा पहिलो पटक सहभागी भएको युवा समाज गछिया मोरङ फाइनलमा प्रवेश गरेको छ ।
.gif)
गत चैत ३० गतेदेखि रात्रिकालीन रूपमा सञ्चालन भइरहेको प्रतियोगिता अन्तर्गत शुक्रबार इटहरीस्थित रङ्गशालामा सम्पन्न खेलमा युवा समाजले साबिक विजेता मछिन्द्र फुटबल क्लबलाई ट्राइबेकरमा पाँच–चार गोलअन्तरले पराजित गर्दै फाइनलमा पुगेको हो ।
निर्धारित समयमा दुवै टोलीले तीन–तीन गोलको बराबरी खेलेपछि खेलको निर्णय पेनाल्टी सुटआउट मार्फत गरिएको थियो । पेनाल्टीमा पनि दुवै टोलीले चार–चार गोल गरेपछि खेल सडनडेथमा पुगेको हो ।
पेनाल्टी सुटआउटमा मछिन्द्रका रोहित चन्द, दीपेश गुरुङ, देबेन्द्र तामाङ र तुसार विश्वकर्माले गोल गरेका थिए भने सनिश श्रेष्ठको प्रहार पोस्टमा लागेर बाहिरिएको थियो । युवा समाजका रामचन्द्र वाजी, विशाल तामाङ, शिशिर लेखी र सृजनराज गौतमले गोल गरेका थिए भने कप्तान सुजन चौधरीको प्रहार पोस्टमा लागेर फर्किएको थियो ।
खेलको २२औँ मिनेटमा युवा समाजका जन्मि धामीले पहिलो गोल गर्दै टोलीलाई अग्रता दिलाएका थिए । त्यसपछि ४६औँ मिनेटमा सुजन डङ्गोल र ५९औँ मिनेटमा पदम भट्टराईले थप गोल गरे ।
मच्छिन्द्र क्लबका पदम बुढाथोकीले खेलको १३औँ र १६औँ मिनेटमा दुई गोल गर्दै टोलीलाई अग्रता दिलाएका थिए । निर्धारित अन्तिम समयमा तुसार विश्वकर्माले थप एक गोल गरेका थिए ।
शुक्रबारको खेलका ‘प्लेयर अफ द म्याच’ युवा समाजका पदम भट्टराई घोषित हुनुभयो । उहाँलाई नगद रु १० हजार पुरस्कार प्रदान गरिएको कार्यक्रम संयोजक अनुरोध थापाले जानकारी दिनुभयो ।
प्रतियोगिताको उपाधिका लागि फाइनल खेल आगामी वैशाख ७ गते हुनेछ । विजेता टोलीले रु १० लाख तथा उपविजेताले रु पाँच लाख नगद पुरस्कार प्राप्त गर्नेछन् । साथै, सर्वोत्कृष्ट खेलाडीलाई रु एक लाख, सर्वाधिक गोलकर्तालाई रु २५ हजार तथा विभिन्न विधामा उत्कृष्ट खेलाडीलाई जनही रु २० हजार पुरस्कार प्रदान गरिने आयोजकले जनाएको छ ।
