बुटवल । लुम्बिनी प्रदेश लोक सेवा आयोगका नवनियुक्त अध्यक्ष हरिप्रसाद बस्याल र सदस्य ताराप्रसाद भुसालले आज पद तथा गोपनीयताको सपथ ग्रहण गरेका छन् ।अध्यक्ष बस्यालले बुटवलस्थित प्रदेश प्रमुखको कार्यालयमा सपथ लिएका हुन् भने सदस्य भुसालले आयोगका अध्यक्ष समक्ष शपथ ग्रहण गरेका छन् । आयोगका अध्यक्ष हरिप्रसाद बस्याललाई उच्च अदालतका मुख्य न्यायाधीश राजेश्वर तिवारीले शपथ गराएका थिए । समारोहमा प्रदेश प्रमुख कृष्णबहादुर घर्ती, मुख्यमन्त्री चेतनारायण आचार्य, सभामुख तुलाराम घर्ती मगर र मुख्य महान्यायाधिवक्ता यमलाल खनाल लगायतको उपस्थिति थियो । संविधानको धारा २४४ तथा प्रदेश लोक सेवा आयोग ऐन २०७६ को दफा ३ को उपदफा ३ बमोजिम नियुक्त आयोगका अध्यक्षले दफा ७ अनुसार कार्यभार सम्हाल्नुअघि प्रदेश प्रमुखको उपस्थितिमा उच्च अदालतका मुख्य न्यायाधीशसमक्ष सपथ ग्रहण गर्नुपर्ने व्यवस्था छ । सोही व्यवस्थाअनुसार नवनियुक्त अध्यक्ष बस्यालले सपथ ग्रहण गरेका हुन् ।
.gif)
यस्तै आयोगका नवनियुक्त सदस्य भुसालले पनि अध्यक्ष बस्यालसमक्ष पद तथा गोपनीयताको सपथ लिएका छन् । प्रदेश लोक सेवा आयोग ऐन, २०७६ को दफा ३ को उपदफा ७ बमोजिम आयोगका सदस्यले अध्यक्षसमक्ष पद तथा गोपनीयताको सपथ लिने प्रावधान छ । अध्यक्ष बस्याल पाल्पा निवासी हुन् भने सदस्य भुसाल अर्घाखाँचीका बासिन्दा हुन् ।
